ცნობილმა ესპანელმა კინორეჟისორმა პედრო ალმოდოვარმა პირველი ინგლისურენოვანი სრულმეტრაჟიანი ფილმი გადაიღო. ფილმში, სახელწოდებით The Room Next Door ("ოთახი მეზობლად"), მთავარ როლებს ოსკაროსანი მსახიობები, ჯულიან მური და ტილდა სუინტონი, ასრულებენ. ალმოდოვარის უახლესი ნამუშევრის პრემიერა 2 სექტემბერს, ვენეციის კინოფესტივალზე შედგება.

ფილმი გვიყვება ინგრიდსა (მურის პერსონაჟი) და მართაზე (სუინტონის გმირი), რომლებიც ახალგაზრდობაში ერთსა და იმავე ჟურნალში მუშაობდნენ და მეგობრობდნენ. მოგვიანებით, ინგრიდი მწერალი გახდა, მართამ კი ომის რეპორტიორობა გადაწყვიტა. როგორც ფილმის აღწერიდან ვიგებთ, "ცხოვრებისეული გარემოებების გამო დაშორებული მეგობრები წლების შემდეგ ისევ ხვდებიან ერთმანეთს უჩვეულო სიტუაციაში".

The Room Next Door-ის ტრეილერი ახლახან გამოვიდა. მასში ვხედავთ, როგორ ინაცვლებენ ინგრიდი და მართა საავადმყოფოს პალატიდან სახლში, სადაც ერთად ცხოვრებასა და ძველი მეგობრობის აღდგენას აპირებენ.

ჯულიან მური ალმოდოვარის ფილმში პირველად ჩნდება, აი, ტილდა სუინტონისა და ესპანელი რეჟისორის საერთო ნამუშევარი კი, მოკლემეტრაჟიანი ფილმი ადამიანის ხმა, 2020 წელს გამოვიდა და დიდი მოწონება დაიმსახურა.

მას შემდეგ, 2021 წელს, ალმოდოვარმა ამ დროისთვის ბოლო სრულმეტრაჟიანი ფილმი Parallel Mothers გამოუშვა, რომელშიც მთავარი როლი პენელოპე კრუსმა შეასრულა. აღსანიშნავია, რომ ორგზის ოსკაროსანი ესპანელი რეჟისორი წელს გამოუშვებს თავის სადებიუტო პროზაულ კრებულსაც, რომელშიც 12 მოთხრობა შედის.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...