69 წლის შოთა კაპანაძეს ოჯახი 12 ივლისის შემდეგ ეძებს.

როგორც მისი შვილი, ია კაპანაძე ფეისბუქზე წერს, კაცი ბერლინში გაფრინდა, თუმცა აეროპორტიდან მისი კვალი იკარგება.

ია კაპანაძის ინფორმაციით, შოთა კაპანაძე ბერლინში ყველა საჭირო საბუთით ჩაფრინდა, თუმცა ის მესაზღვრეებმა დააყოვნეს, რათა ჩასვლის მიზეზი დაეზუსტებინათ.

"მერე, როგორც შეგვატყობინეს სატელეფონო კავშირით, გავუშვითო [აეროპორტიდან], ოღონდ რამდენიმე საათის შემდეგ. სწორი თქვეს თუ არა, ესეც გასარკვევია!

უნდა წასულიყო სხვა ქალაქში, მაგრამ ადგილზე არაა მისული! რამდენიმე დღით მიდიოდა და უნდა დაბრუნებულიყო", — წერს ია კაპანაძე.

ქალის ინფორმაციით, შოთა კაპანაძეს, გაუჩინარების დღეს, ეცვა თეთრი პერანგი წვრილი ზოლებით, შავი მაღალყელიანი ფეხსაცმელი, შავი კლასიკური შარვალი და ეხურა შავი კეპიანი ქუდი. ასევე, ჰქონდა ადიდასის ლურჯი ზურგჩანთა, ყვითელი ზოლებით.