რუსეთის უშიშროების ფედერალურმა სამსახურმა (FSB) განაცხადა, რომ ჩრდილოეთ კავკასიის რესპუბლიკაში, ადიღეში მართლმადიდებლურ ეკლესიაზე ტერორისტული თავდასხმა აღკვეთა.

FSB-მ განაცხადა, რომ დააკავეს 18 წლის ბიჭი შუა აზიის ქვეყნიდან, რომელიც "საერთაშორისო ტერორისტული ორგანიზაციის" წევრია.

რუსეთის სახელმწიფო საინფორმაციო სააგენტო TASS, FSB-ზე დაყრდნობით წერს, რომ დაკავებული ამზადებდა თავდასხმას ადიღეს დედაქალაქ მაიკოპში მართლმადიდებლურ ეკლესიაზე, განზრახვა სასულიერო პირებისა და დაცვის თანამშრომლების მოკვლა იყო.

"ტერორისტმა […] შეისწავლა ტერიტორია, შეადგინა თავდასხმის გეგმა, შეიძინა საჭირო კომპონენტები და დაამზადა ხელნაკეთი ცეცხლის გამჩენი მოწყობილობები", — წერს TASS.

ტერაქტის მოწყობის ბრალდებით, ეჭვმიტანილის წინააღმდეგ, სისხლის სამართლის საქმეა აღძრული.

TASS-ის ცნობით, დაკავებულს აღმოაჩნდა "საერთაშორისო ტერორისტული ორგანიზაციის აკრძალული მასალები, ტერორისტული ორგანიზაციის დროშა, დანა და ცეცხლის გამჩენი მოწყობილობის კომპონენტები“.

TASS-მა, ასევე, გამოაქვეყნა ეჭვმიტანილის დაკავებისა და დაკითხვის კადრები, სადაც 18 წლის მოზარდი აღწერს, თუ როგორ გეგმავდა თავდასხმას.

"წავიღეთ საწვავი, გვინდოდა ღობეზე ასვლა და ეკლესიისთვის ცეცხლის წაკიდება. მე ვუყურე ვიდეოებს, სადაც ამ დროშებით იყვნენ ადამიანები, [...] ისლამური სახელმწიფოს დროშით, და ხალხი ამბობს — "რატომ უკიდებენ ისინი ცეცხლს თქვენს მეჩეთებს, თქვენ კი არაფერს აკეთებთ", — ამბობს დაკავებული კადრებში.

"დაცვა რომ ყოფილიყო, ვაპირებდით, მოგვეკლა. თავდაპირველად, ვთქვი, რომ დანას დავარტყამდი მას, თუმცა მათ უნდოდათ, რომ ბენზინი დაესხათ და კარი გაგვეღო", — აღნიშნა მან.

დაგეგმილი თავდასხმის სხვა მონაწილეების შესახებ ინფორმაცია არ გავრცელებულა.

23 ივნისს, სულ მცირე 20 ადამიანი დაიღუპა და 16-ის ჰოსპიტალიზაცია გახდა საჭირო დერბენტსა და მაჰაჩყალაში ეკლესიებსა და სინაგოგაზე თავდასხმების შედეგად.

თავდასხმების შემდეგ, უსაფრთხოების ზომები გაძლიერდა ჩრდილოეთ კავკასიაში, რუსი ოფიციალური პირები სულ უფრო ხშირად საუბრობენ რეგიონში რადიკალიზმსა და ექსტრემიზმზე.

9 ივლისს FSB-ის დირექტორმა ალექსანდრე ბორტნიკოვმა გამართა შეხვედრა ჩრდილოეთ კავკასიაში ტერორიზმთან ბრძოლის შესახებ.

მან განაცხადა, რომ მიიღეს ზომები, რათა გაიზარდოს ეფექტიანობა, ფედერალურ სააგენტოებსა და რესპუბლიკების უწყებებს შორის თანამშრომლობით, ტერორიზმთან საბრძოლველად.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.