მოკლედ: ევროკავშირის 12 ქვეყნის საგარეო საქმეთა მინისტრი, საქართველოს ხელისუფლების მიერ ინიციირებულ რუსულ კანონთან დაკავშირებით, ევროკომისიის უმაღლეს წარმომადგენელს, ჯოზეფ ბორელსა და ევროკომისარს, ოლივერ ვარჰეის მიმართავს.

  • მინისტრების თქმით, საქართველოს მთავრობის მიერ ამ კანონპროექტის ინიციირება საფრთხეს უქმნის ქვეყნის ევროპულ და ევროატლანტიკურ გზას.
  • ისინი მოუწოდებენ ბორელსა და ვარჰეის, დაასახელონ კონკრეტული გავლენა, რასაც რუსული კანონპროექტის მიღება იქონიებს საქართველოსთვის ევროკავშირის მიერ განსაზღვრული 9 ნაბიჯის შესრულების კონტექსტში.
  • მინისტრები აღნიშნავენ იმასაც, რომ მშვიდობიანი მომიტინგეებისა და ჟურნალისტების წინააღმდეგ ძალის გამოყენება, დემოკრატიასა და ევროპულ ღირებულებებს არ შეესაბამება.

განცხადება: "რამდენადაც საქართველოს პარლამენტი იღებს კანონს ე.წ. უცხოური გავლენის შესახებ, მიუხედავად შეშფოთების მრავალი სიგნალისა, როგორც საკუთარი სამოქალაქო საზოგადოების, ისე საქართველოს პარტნიორების მხრიდან, ჩვენ უნდა ვიპოვოთ შემდგომი გზები, რათა გავუგზავნოთ ცალსახა გზავნილი თბილისს, რომ ეს კანონმდებლობა შეუთავსებელია საქართველოს პროგრესთან ევროკავშირის გზაზე.

  • ახლა პირდაპირ და ცხად გზავნილს დიდი მნიშვნელობა აქვს საქართველოს ევროპული მომავლის უზრუნველსაყოფად. აქედან გამომდინარე, უნდა იქნას მითითებული კონკრეტული შედეგები, თუ საქართველოს მმართველი პარტია მიიღებს კანონს, რომელიც არ შეესაბამება ევროკავშირის ძირითადად ნორმებსა და ღირებულებებს.
  • ჩვენი პრინციპული პოზიცია და მტკიცე ქმედება არის ის, რასაც ჩვენგან ელის ქართველი ხალხი, რომელიც თავისი ქვეყნის ევროპული მომავლისკენ ისწრაფვის". [ფორმულას თარგმანი]

განცხადებას ხელს აწერენ ჩეხეთის, დანიის, ესტონეთის, ფინეთის, საფრანგეთის, გერმანიის, ირლანდიის, ლატვიის, ლიეტუვის, ნიდერლანდების, პოლონეთისა და შვედეთის საგარეო საქმეთა სამინისტროები.

ბოლო ხაზი: ევროკომისიის უმაღლესი წარმომადგენელი, ჯოზეფ ბორელი, საქართველოში მიმდინარე მოვლენებს აქამდე არაერთხელ გამოეხმაურა. მან ხელისუფლების მხრიდან მშვიდობიანი მომიტინგეების დარბევისა და ძალადობის ფაქტები დაგმო და მთავრობას მოუწოდა, არ ააცდინოს ქვეყანა ევროკავშირის გზას.