რა ხდება: "მივიღეთ გადაწყვეტილება, რომ ორშაბათიდან უარი ვთქვათ აუდიტორიებში შესვლაზე. დილის 9 საათიდან ვიდგებით რუსთაველის გამზირზე", — განაცხადეს სტუდენტებმა დღეს, 11 მაისს, უნივერსიტეტის ეზოში. ამით თბილისის სახელმწიფო უნივერსიტეტის სტუდენტების ნაწილი უარს აცხადებს ლექციებზე დასწრებაზე, ვიდრე საქართველოს ხელისუფლება რუსულ კანონს უკან არ გაიწვევს.

სტუდენტების განცხადება: "გვსურს გამოვეხმაუროთ ბოლო დღეებისა და კვირვების განმავლობაში, ქვეყანაში განვითარებულ მოვლენებს და გაცნობოთ თბილისის სახელმწიფო უნივერსიტეტის სტუდენტების განცხადება.

• თბილისის ქუჩებში მშვიდობიანი დემონსტრაციების არალეგიტიმურმა და სასტიკმა დარბევებმა, ბოლო კვირების განმავლობაში, პერმანენტული და უმძიმესი ხასიათი მიიღო.
• ხელისუფლების მიერ დაქირავებული ზონდერები საკუთარ სახლებთან უსაფრდებიან, თავს ესხმიან და ასახიჩრებენ პოლიტიკურ ოპონენტებს; ტერორს უწყობენ ყველას, ვინც რეჟიმის რუსულ პოლიტიკას არ ეთანხმება.
• დღეს უკვე აღარ არის საუბარი ევროპული მომავლის დაცვაზე, რომლის დაკარგვასთანაც ასე ახლოს არასდროს ვყოფილვართ. თბილისის სახელმწიფო უნივერსიტეტის სტუდენტები არ ვაპირებთ მდუმარედ შევეგუოთ ქვეყანაში გაცხადებული დიქტატურის დამყარების პროცესს. როგორც ჩანს, საკმარისი აღარ არის მხოლოდ აქციებზე დგომა და ამ გზით პროტესტის გამოხატვა, წინააღმდეგობის გაწევა ამ შეუქცევადი კატასტროფის მიმართ.
• როცა ქუჩაში ხმის ამოღება ბრუტალური მეთოდებით ისჯება, ჩვენთვის შეუძლებელი ხდება მშვიდად აუდიტორიებში ჯდომა, ეს არ არის ორდინალური ვითარება და ასეთი რეალობა ადეკვატურ ქცევას მოითხოვს. სწორედ ამიტომ, მივიღეთ გადაწყვეტილება, რომ ორშაბათიდან უარი ვთქვათ აუდიტორიებში შესვლაზე. დილის 9 საათიდან ვიდგებით რუსთაველის გამზირზე და გავაპროტესტებთ დიქტატურის საკანონმდებლო დონეზე გაფორმების მცდელობას.
• ჩვენ უკან დგას ათასობით სტუდენტი, რომელიც არ აპირებს დათმოს ჩვენი ქვეყნის თავისუფლება და მისი ევროპული მომავალი, კონსტიტუციით გარანტირებული უფლებები.
• მოვუწოდებთ ჩვენს ლექტორებს, მიიღონ ადეკვატური გადაწყვეტილება, უარი თქვან სამსახურში მოსვლაზე, გამოაცხადონ საყოველთაო გაფიცვა და დადგნენ ჩვენთან ერთად რუსთაველის გამზირზე. მივმართავთ სხვა სახელმწიფო თუ კერძო უნივერსიტეტების სტუდენტებს, შეწყვიტეთ აკადემიური პროცესი საკუთარ უნივერსიტეტებში, გამოდით აუდიტორიებიდან და შემოუერთდით ჩვენს წამოწყებას.
• საქართველო არ გახდება რუსეთი და ამის გარანტორები ვართ ჩვენ, დამოუკიდებელ საქართველოში დაბადებული თაობა, წინ ევროპისკენ, ძალა ერთობაშია".

კონტექსტი: ქართული ოცნების დაჟინებულ სურვილს, მიიღოს რუსული კანონი საქართველოში, ხალხი მრავალათასიანი საპროტესტო აქციებით ეწინააღმდეგება თბილისსა და საქართველოს სხვა ქალაქებში. ხელისუფლება პერიოდულად იყენებს ძალას მშვიდობიანი დემონსტრანტების წინააღმდეგ, რის შედეგადაც დაზიანებული და დაკავებულია არაერთი მოქალაქე.

• ორშაბათს, 13 მაისს, 09:00 საათზე, საქართველოს პარლამენტის იურიდიულ საკითხთა კომიტეტი, რუსულ კანონს მესამე მოსმენით განიხილავს.
• მას შემდეგ, რაც ამ კანონპროექტს პარლამენტი მესამე მოსმენითაც დაუჭერს მხარს, ხელმოსაწერად პრეზიდენტს გადაეგზავნება.
• სალომე ზურაბიშვილმა თქვა, რომ კანონს ხელს არ მოაწერს და ვეტოს დაადებს.
• თუმცა, ეს იქნება სიმბოლური აქტი, რადგან ქართულ ოცნებას აქვს რესურსი, ვეტო დაძლიოს