რუსული კანონის საწინააღმდეგო აქციები გრძელდება და უფრო და უფრო მასშტაბური ხდება. ამას პოპულარულ ფეისბუქჯგუფებში მოქალაქეების გაზრდილი აქტიურობაც მოწმობს. ერთ-ერთი ასეთია მოგზაურთა კლუბი — Cheap Travel Georgia, რომელშიც 316 000-ზე მეტი წევრია. ჯგუფში გაწევრიანებულ ადამიანებს კი მოგზაურობის სიყვარულის გარდა ევროპული ღირებულებები და ქვეყნის ნათელი მომავლის შექმნის სურვილიც აერთიანებთ.

ცოტა ხნის წინ ჯგუფის ერთ-ერთმა წევრმა რეგიონში მცხოვრებ ადამიანებს, რომლებსაც თბილისში რუსული კანონის გაპროტესტება უნდათ, თავის სახლში დატოვება შესთავაზა.

"გამარჯობა, ჩემი ორი მეგობარი, რომლებიც ზუგდიდში ცხოვრობენ, ჩამოდიან აქციაზე და შევთავაზე, რომ ჩემთან დარჩენილიყვნენ, ამხელა გზაზე წინ და უკან რომ არ ეარათ. აქედან გაჩნდა იდეა, რომ რამდენიმე ადამიანის დატოვებას ჩემი სახლის მონაცემები იძლევა, ასე რომ თუკი აქეთ გსურთ აქციას შემოუერთდეთ (რაიონული მხარდაჭერა კიდევ უფრო მეტ ძალას შეგვმატებს), ჩემი კარი ორი-სამი ადამიანისთვის ღიაა.

აქვე დავამატებდი, რომ შესაძლოა მსგავსი სურვილი არა ორ-სამ ადამიანს, არამედ ბევრს ჰქონდეს და კარგი იქნებოდა, დედაქალაქში მაცხოვრებლებმა კარი გავუღოთ ჩვენს თანამებრძოლებს. ასე უფრო მეტნი ვიქნებოდით და გამოჩნდებოდა დანაწევრებული აქციების გაერთიანების ძალაც", — წერს ჯგუფის წევრი მარიამ ბაბუნაშვილი.

პოსტს დიდი გამოხმაურება მოჰყვა და საკუთარი სახლის კარის სხვებისთვის გაღების სურვილი ჯგუფის სხვა წევრებმაც გამოთქვეს:

"კატები თუ გიყვართ და ალერგია არ გაქვთ, 1 ადამიანს სადმე დავატევ"

"მეც დავატევ ორ გოგოს. შინაური ცხოველიც დაიშვება"

"აქ ვარ, დაგიტოვებთ 2 ადამიანს. ჩამოდით, დადექით ჩვენთან ერთად"

"მეც შემიძლია, ხალხო, ულიფტო მერვე სართულს და დივანზე დაწოლას თუ იკადრებთ, მოდით"

შეგახსენებთ, რომ უწყვეტი პროტესტის მიუხედავად, პარლამენტი რუსული კანონის მიღების პროცედურას აგრძელებს.