პოლიციის განყოფილებაში შეჭრის მცდელობისთვის და შესასვლელთან ხელყუმბარის სროლისთვის ერევანში სამი კაცი დააკავეს. მათ წინააღმდეგ საქმე ტერორიზმის მუხლით აღიძრა.

სამმა მამაკაცმა ერევანში, ნორ ნორკის პოლიციის სამმართველოში შეჭრა გუშინ, 24 მარტს სცადა.

შინაგან საქმეთა სამინისტრომ განაცხადა, რომ ისინი "პოლიციის განყოფილების ყუმბარებით აფეთქებას იმუქრებოდნენ“ და ერთ-ერთმა მათგანმა, რომელიც მხოლოდ ინიციალებით იდენტიფიცირდება, პოლიციის განყოფილების შესასვლელთან ყუმბარა ისროლა.

აფეთქების შედეგად პოლიციელები არ დაშავებულან, თუმცა ორ ეჭვმიტანილს ფეხის არეში ჰქონდა დაზიანებები, ინციდენტის შემდეგ ისინი საავადმყოფოში გადაიყვანეს. ჯანდაცვის სამინისტროში რადიო თავისუფლებას განუცხადეს, რომ დაშავებულების მდგომარეობა საშუალო სიმძიმისაა.

მესამე ეჭვმიტანილი, პოლიციასა და ეროვნული უსაფრთხოების სამსახურის თანამშრომლებთან თითქმის ორსაათიანი მოლაპარაკების შემდეგ, დააკავეს. მას პოლიციამ ოთხი ყუმბარა აღმოუჩინა.

იმავე დღეს, სომხეთის საგამოძიებო კომიტეტმა ტერორიზმის ბრალდებით, სამი კაცის წინააღმდეგ გამოძიება დაიწყო.

სომხეთის ხელისუფლებას თავდასხმის მოტივი ჯერ არ დაუსახელებია.

შინაგან საქმეთა სამინისტროს სპიკერმა, ნარეკ სარგსიანმა ჟურნალისტებს განუცხადა, რომ მესამე ეჭვმიტანილს ჰქონდა "სხვადასხვა" და "გაუგებარი" მოთხოვნები.

გუშინ, დღის ბოლოს, მმართველ პარტიასთან დაკავშირებულმა მედიასაშუალებებმა განაცხადეს, რომ სამი ეჭვმიტანილი კავშირში იყო სასნა ცრერთან — ჯგუფთან, რომელმაც კონტროლი აიღო ერევანში პოლიციის განყოფილებაზე 2016 წელს, მოკლა ერთი პოლიციელ, რამდენიმე კი მძევლად აიყვანა.

ასევე, ჯგუფის წევრებმა მოითხოვეს ყოფილი პრეზიდენტის სერჟ სარგსიანის გადადგომა და აზერბაიჯანისთვის მთიანი ყარაბაღის გადაცემის შესახებ პოტენციური მოლაპარაკების დაუყოვნებლივ შეწყვეტა.

დღეს დილით, 25 მარტს, ეროვნულ-დემოკრატიულმა ალიანსმა, სასნა ცრერის წევრებთან დაკავშირებულმა ჯგუფმა განაცხადა, რომ პოლიციამ მათი მხარდამჭერების ბინებში ჩხრეკა ჩაატარა.

მოგვიანებით, იმავე დღეს, ჯგუფმა პასუხისმგებლობა აიღო თავდასხმაზე. შინაგან საქმეთა სამინისტროს სპიკერმა, ასევე, დაადასტურა, რომ თავდამსხმელები, როგორც ჩანს, ალიანსის წევრები იყვნენ.

ეროვნულ-დემოკრატიულმა ალიანსმა თავდამსხმელთა სახელები და ფოტოები გამოაქვეყნა, ჯგუფის მოთხოვნებთან ერთად. ისინი მოითხოვენ პრემიერ-მინისტრ ნიკოლ ფაშინიანის თანამდებობიდან გათავისუფლებას, სომხეთის "ღალატის“ გამო.

სტატია განახლდა 25 მარტს, მას შემდეგ, რაც ეროვნულ-დემოკრატიულმა ალიანსმა აიღო პასუხისმგებლობა თავდასხმაზე.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.