ადამიანის უფლებათა ცენტრის განცხადებით, თბილისის საქალაქო სასამართლოს გადაწყვეტილებით, 2011 წლის 26 მაისის საპროტესტო აქციაზე შინაგან საქმეთა სამინისტროს, მოქალაქის სასარგებლოდ დაეკისრა მორალური ზიანის ანაზღაურება ხუთი ათასი ლარის ოდენობით.

საქმის მასალების თანახმად, 2011 წლის 26 მაისს თბილისში, საქართველოს პარლამენტთან მიმდინარეობდა მშვიდობიანი საპროტესტო აქცია, რომლის ძალადობრივი გზით დაშლისა და მომიტინგეთა მასობრივი დაკავების ბრძანება გასცა შს მინისტრმა ივანე მერაბიშვილმა:

ბრალდების მხარის მტკიცებით, საპროტექსტო აქციის ერთ-ერთი მონაწილე დააკავეს პოლიცელებმა და მიაყენეს ფიზიკური შეურაცხყოფა.

აღნიშნული ქმედების ბრალდებით, ვანო მერაბიშვილი, დამნაშავედ სცნეს სისხლის სამართლის კოდექსით გათვალისწინებული დანაშაულის - სახელმწიფო პოლიტიკური თანამდებობის პირის მიერ სამსახურებრივი უფლებამოსილების გადამეტების საფუძვლით.

2011 წლის 26 მაისის საპროტესტო აქციის დარბევისას დაზარალებული მოქალაქის ინტერესებს სასამართლოში ადამიანის უფლებათა ცენტრი იცავდა.

ადამიანის უფლებათა ცენტრი მიიჩნევს, რომ სახელმწიფო ხელისუფლების თანმდებობისა თუ საჯარო მოხელეთა მიერ ჩადენილი არც ერთი დანაშაულებრივი ქმედება არ უნდა დარჩეს დაუსჯელი. ხოლო დაზარალებულთა უფლებების აღდგენა და მათი რეაბილიტაცია უნდა მოხდეს სამართლიანი სასამართლოს პირობებში.