კინოკლასიფიკაციის ბრიტანული კომისიის (BBFC) გადაწყვეტილებით, კლასიკად ქცეულ ფილმზე მერი პოპინსი ასაკობრივი შეზღუდვა გაიზარდა. 1964 წელს გამოშვებული კინოსურათი აქამდე U (უნივერსალურ) კატეგორიას მიეკუთვნებოდა, მაგრამ ამიერიდან PG ნიშნულით ("მშობლის ზედამხედველობით სანახავი") იქნება ნაჩვენები.

კომისიის ცნობით, გადაწყვეტილების მიზეზი ფილმში გამოყენებული "დისკრიმინაციული ენაა"; ერთ-ერთი პერსონაჟი საკვამურის მწმენდავს ორჯერ მოიხსენიებს ტერმინით, რომელიც "თეთრკანიანი ევროპელების მიერ გამოყენებული დამამცირებელი სიტყვაა სამხრეთ აფრიკაში მცხოვრები მომთაბარე ხალხის აღსანიშნავად".

"რადგან მერი პოპინსს ისტორიული კონტექსტი აქვს, დისკრიმინაციული ენის გამოყენებისთვის არ ვკიცხავთ", — ვკითხულობთ კომისიის განცხადებაში, — "თუმცა, U-კატეგორიისთვის ეს შეუფერებელი ენაა. ამდენად, დისკრიმინაციული ენის გამო, მისი რეკლასიფიკაცია გახდა საჭირო".

///

კომისია ასევე აცხადებს, რომ მათ მიერ ჩატარებული კვლევის თანახმად, მაყურებლებს, განსაკუთრებით მშობლებს, ყველაზე მეტად აღელვებთ, "ბავშვებმა დისკრიმინაციული ენა არ მოისმინონ ან არ ნახონ დისკრიმინაციული ქცევა, რომელიც შეიძლება გაუაზრებლად გაიმეორონ".

პ.ლ. ტრევერსის საბავშვო წიგნების ცნობილი სერიის მიხედვით გადაღებული მერი პოპინსი ეკრანებზე 1964 წლის ზაფხულში გამოვიდა. ფილმში მთავარი როლი ჯული ენდრიუსმა შეასრულა, პროექტის პროდიუსერი კი თავად უოლტ დისნეი გახლდათ. კინოსურათს განსაკუთრებული წარმატება ხვდა წილად: დაახლოებით $6-მილიონიანი ბიუჯეტის საპირწონედ $103 მილიონზე მეტი გამოიმუშავა, ამასთან, წარდგენილი იყო ოსკარის 13 ნომინაციაში, საიდანაც ხუთში გაიმარჯვა კიდეც.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...