მოსკოვის ოლქის ერთ-ერთ ქალაქში, მეოთხე კლასის მოსწავლეებს, ჩეჩნეთის სამხედრო სპეცდანიშნულების რაზმმა საახალწლო საჩუქრები გადასცა, ქვედანაყოფის მხარდაჭერისთვის მადლიერების ნიშნად.

აფტი ალაუდინოვმა, სპეცრაზმ "ახმატის" მეთაურმა, 3 იანვარს თავის Telegram არხზე განაცხადა, რომ ბავშვები დაასაჩუქრეს კოლომნას სკოლაში. ეს ქალაქი მოსკოვიდან 100 კმ-ის დაშორებით, სამხრეთ-აღმოსავლეთით მდებარეობს.

სწრაფი რეაგირების დანაყოფი "ახმატი" რუსეთის ეროვნული გვარდიის შემადგენლობაშია, რომელიც მოქმედებს ჩეჩნეთში, ამჟამად იბრძვის უკრაინაში. დანაყოფი ჩეჩნეთის პირველი პრეზიდენტის, ახმატ კადიროვის სახელს ატარებს. ჩეჩნეთის ხელმძღვანელის, რამზან კადიროვის თქმით, უკრაინაში რაზმის 30 000-ზე მეტი ჯარისკაცი იბრძვის.

ალაუდინოვმა დაწერა, რომ სკოლის მოსწავლეები "დიდი ხნის განმავლობაში“ ამზადებდნენ სხვადასხვა ნივთს — მათ შორის, კამუფლაჟის ბადეებს, წერდნენ წერილებს და უგზავნიდნენ რბილ სათამაშოებს უკრაინაში მებრძოლ "ახმატის" ჯარისკაცებს.

"საახალწლოდ მათთვის საჩუქრები მოვაგროვეთ, რადგან დარწმუნებულები ვართ, რომ ასეთი ქცევა უნდა წახალისდეს და ვაჩვენოთ, რომ მათი შრომა ფუჭი არ არის და ძალიან მნიშვნელოვანია“, - წერს ალაუდინოვი და აქვეყნებს დროშის ფონზე გადაღებულ ფოტოებს, სადაც ბავშვებს ხელში საჩუქრები უჭირავთ.

მოსწავლეებს დაურიგეს ფინჯნები ახმატ კადიროვის პორტრეტით და ლოზუნგით "ახმატი ძალაა! ფრონტზე დახმარებისთვის და გამარჯვებაში შეტანილი წვლილისთვის!“, რუსეთის დროშა "ახმატით“, ასევე, Danone-ს მიერ წარმოებული პროდუქტები, რომლის რუსულ შვილობილ კომპანიას ხელმძღვანელობს იაკუბ ზაკრიევი, რამზან კადიროვის ძმისშვილი, რომელიც, ასევე, ჩეჩნეთის რესპუბლიკის სოფლის მეურნეობის მინისტრია.

გავრცელებული ინფორმაციით, ალაუდინოვი მონაწილეობდა ჩეჩენი უფლებადამცველის რუსლან კუტაევის წამებაში, რესპუბლიკაში ათობით დაკავებულის სიკვდილით დასჯასა და დაკავებული ახალგაზრდების ნათესავების ცემაში. 2014 წელს ალაუდინოვი მოხვდა აშშ-ის მაგნიტსკის სანქციების იმ პირთა სიაში, რომლებიც მონაწილეობდნენ ადამიანის უფლებების დარღვევაში, ან მნიშვნელოვან კორუფციულ საქმეებში.

"ახმატის" დანაყოფის წევრები ჩეჩნეთში აქტივისტების წამებაშიც არიან ბრალდებულები.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.