დღეს, გუდიაშვილის ბაღში, ალეკო ელისაშვილმა საკუთარი თავი ოფიციალურად წარადგინა თბილისის მერობის დამოუკიდებელ კანდიდატად. მისი თქმით, გამარჯვების შემთხვევაში, ის მოქალაქეებს ყოველდღიურად ჩააბარებს ანგარიშს და თბილისს, "ლაზათს და ეშხს" დაუბრუნებს.

მისი თქმით, ის თბილისს გადააქცევს ქალაქად, რომელში ცხოვრებაც კომფორტული იქნება.

"რაც შემიძლია დაგპირდეთ, მე ჩემს თავს არ ვუღალატებ, ჩემი ცხოვრების წესს არ ვუღალატებ, როგორც დავდიოდი ქუჩაში ფეხით, ისევ ისე ვივლი, როგორც ახლა ვარ თქვენთვის ხელმისაწვდომი, თითოეული თქვენგანისთვის ხელმისაწვდომი მერი ვიქნები გამარჯვების შემთხვევაში, ამას ნამდვილად გპირდებით, არ გვეყოლება ჩვენ შუამავლები და არ ვაპირებ პატაკები ვაბარო სოლოლაკის სასახლეს ან კიევში დეპეშები გავგზავნო და მოვუყვე, როგორი კარგი ბიჭი ვარ" - განაცხადა ელისაშვილმა.

მერობის დამოუკიდებელი კანდიდატის თქმით, მისი კონკურენტები მოსახლეობას იმ პრობლემების მოგვარებას ჰპირდებიან, რომლებიც მათი ხელისუფლების მმართველობის პერიოდში შეიქმნა.

ელისაშვილი მიიჩნევს, რომ ქართულ ოცნებას დაავიწყდა, როგორ შეიცვალა საქართველოს ხელისუფლება 2012 წელს და ის დარწმუნებულია, რომ 2017 წლის ოქტომბრის ბოლოს, თბილისის ხელისუფლება შეიცვლება.