რა ხდება? BBC-ის მიხედვით, 20-ზე მეტი უკრაინელი ჯარისკაცი ემსხვერპლა რუსეთის სარაკეტო თავდასხმას, 3 ნოემბერს.

  • კიევი საჯაროდ არ ასახელებს თავდასხმის ადგილს, მაგრამ უკრაინული მედიის ცნობით, შემთხვევა ფრონტის ხაზთან ახლოს მოხდა.
  • რუსეთის სამხედრო ძალებს თავდასხმის შესახებ ოფიციალური კომენტარი ჯერ არ გაუკეთებიათ.

დეტალები: სავარაუდოდ, რუსმა ოკუპანტებმა მაშინ მიიტანეს იერიში, როდესაც უკრაინის 128-ე სამთო თავდასხმის ბრიგადა არტილერიის დღესთან დაკავშირებულ დაჯილდოების ცერემონიას ატარებდა.

  • 128-ე სამთო თავდასხმის ბრიგადის ჯარისკაცების დაღუპვა დაადასტურა უკრაინის თავდაცვის მინისტრმა.
  • პრეზიდენტმა, ვოლოდიმირ ზელენსკიმ თქვა, რომ "ინციდენტის თავიდან არიდება შესაძლებელი იყო" და დასძინა, რომ დაწყებულია სისხლის სამართლის საქმე.

ბოლო ხაზი: ზოგი უკრაინელი ჯარისკაცი და სამხედრო ექსპერტი აცხადებს, რომ თავდასხმის რისკის ზონაში ცერემონია არ უნდა ჩატარებულიყო.
მათი თქმით, უკრაინელ ოფიცრებს უნდა სცოდნოდათ, რომ რუსული უპილოტო თვითმფრინავები მუდმივად აკვირდებიან უკრაინული ჯარების მოქმედებას ფრონტის ხაზთან, შესაბამისი საჰაერო და საარტილერიო დარტყმების დასაგეგმად.