კარგად იცი, როგორი ხმა გაქვს, ჰო? ყოველთვის გესმის, როცა ლაპარაკობ და პრობლემა არ გაქვს. ამის მიუხედავად, როდესაც მას ჩაწერ და ჩართავ, უცხოპლანეტელის ხმასავით ჟღერს. რატომ ხდება ჩვენი ხმა ასეთი განსხვავებული, როდესაც მას სხვა რაღაციდან ვისმენთ და არა საკუთარი თავისგან?

ვიბრაციის გზები

როცა ვლაპარაკობთ, ხორხში არსებული ხმის იოგები ვიბრირებენ და ბგერას წარმოქმნიან. ეს ვიბრაციები ჰაერის საშუალებით მსმენელის ყურში გადაადგილდება, სადაც მათ ყურის ბარაბანთან კონტაქტი აქვთ და იწვევენ მის ვიბრაციას. ეს ვიბრაციები შემდეგ აღწევენ ლოკოკინაში, რომელიც მათ ელექტრულ იმპულსებად აქცევს და შემდეგ სმენითი ნერვების საშუალებით ტვინამდე აღწევს. ჰაერის გამტარობის გამო აღვიქვამთ არა მარტო ჩვენს, არამედ სხვების ხმებსაც.

თუმცა, როდესაც შენ საკუთარი ლაპარაკი გესმის, ეს ვიბრაციები ლოკოკინამდე მისასვლელად სხვა, უფრო პირდაპირ გზას ირჩევენ. ხმა თავის ქალის გავლით გადაადგილდება, რომელიც მოიცავს ძვლებსაც და რბილ ქსოვილებსაც. ჰაერზე მკვრივი სტრუქტურების გავლით გადაადგილებისას დაბალი სიხშირის ვიბრაციები უფრო იზრდება, რის გამოც ლოკოკინას შესამჩნევად დაბალი ბგერები აღწევს. აქედან გამომდინარე, როდესაც მას ტვინი აღიქვამს, ჩვენი ხმა უფრო სრული, დაბალი ტონის გვეჩვენება, ვიდრე ხორხში წარმოქმნილი თავდაპირველი ბგერები.

სამწუხაროდ, ჩანაწერის მოსმენისას სრულად ანადგურებ ბგერის შიდა გზებს. შედეგად გრჩება იზოლირებული, ჰაერის გავლით მოსული შენი ლაპარაკი და არა - ძვლის გავლით წარმოქმნილი გაძლიერებული ბგერები. ამის გამო გეჩვენება შენი ხმა მსოფლიოში ყველაზე საშინელ ხმად.

რამდენად ნორმალურია ეს?

მიუხედავად იმისა, რომ ძალიან უცნაურად გეჩვენება, როდესაც შენ მოგდის ასეთი რამე, თუმცა, არ იდარდო, მარტო არ ხარ, ყველას აღიზიანებს თავისი ლაპარაკი. თუ ვინმეს ლაპარაკს უსმენ, შეიძლება მათ იფიქრონ, რომ მათი ხმა იმაზე უფრო ბოხია, ვიდრე რეალურადაა.

უბრალოდ, დაიმახსოვრე, რომ ის ხმა, რომელიც ჩანაწერში გესმის, არის ის, რასაც ყველა ისმენს. ეს ძალიან განსხვავებულია იმასთან შედარებით, რასაც ჩვენ ვართ მიჩვეულნი. ამიტომ, შეიძლება ჩანაწერში მოსმენილი შენი ხმა გეზიზღებოდეს, მაგრამ არ იდარდო - სრულიად ნორმალურია და ალბათ არც ისეთი ცუდია, როგორც შენ ფიქრობ.