საქართველოს ახალგაზრდული ნაკრები ევროპის 21-წლამდელთა ჩემპიონატს მეოთხედფინალში გამოეთიშა. რამაზ სვანაძის გუნდი ისრაელთან პენალტების სერიაში დამარცხდა, მაგრამ ოლიმპიადაზე მოხვედრის შანსს ჯერ კიდევ ინარჩუნებს.

აღსანიშნავია, რომ საქართველო ტურნირს ძირითად დროში მატჩის წაგების გარეშე გამოეთიშა. 21-წლამდელებს ევროპის ჩემპიონატის ფინალურ ეტაპზე დებიუტი ჰქონდათ, შესაბამისად, ე.წ. "სიკვდილის ჯგუფიდან" გასვლა და თანაც პირველი ადგილით — კარგი შედეგია. შეგახსენებთ, რომ ჯგუფიდან ვერ გავიდნენ ბელგია და ნიდერლანდები, ასევე მეოთხედფინალს მიღმა დარჩნენ გერმანია და იტალია.

ბორის პაიჭაძის სახელობის დინამო არენაზე ქართველმა გულშემატკივარმა იქამდე მის მიერვე დამყარებული რეკორდი კიდევ ერთხელ გააუმჯობესა და დასწრების მაჩვენებელი — 44 338 გახლდათ.

საქართველოს ახალგაზრდული ნაკრები ბოლო წამამდე იბრძოდა და უკანასკნელ მომენტში საჯარიმოს ხაზთან სახიფათო ჯარიმის შესრულების უფლებაც მოიპოვა, მაგრამ გატანა ვერ მოახერხეს. სვანაძის გუნდს ბრძოლისუნარიანობა და ჟინი არ აკლდა. საქართველო ბურთსაც ფლობდა, განსაკუთრებით— მეორე ტაიმში და დამატებული ტაიმების დროს, მაგრამ რამდენიმე ძალიან მწვავე შეტევის მიუხედავად, კარში ზუსტი დარტყმა 120 წუთის მანძილზე არ გვქონია.

საგულისხმოა, რომ მეტოქემ რამდენჯერმე დაარტყა და მამარდაშვილმა გვიხსნა. პენალტების სერიაში კი ისრაელის მეკარემ, რომელიც თერთმეტმეტრიანების მოგერიების ოსტატია (რაც გერმანიასთან შეხვედრაშიც დაადასტურა) ერთი პენალტი აიღო, ერთიც ძელს მოხვდა და საქართველო ნაკრები ტურნირს დაემშვიდობა, მაგრამ საქართველო — არა, რადგან დღეს ქუთაისში ინგლისი და პორტუგალია ითამაშებენ, ხოლო ბათუმის აჭარაბეთ არენა 5 ივლისს ნახევარფინალურ მატჩს უმასპინძლებს, 8 ივლისს კი — ფინალს.

მატჩის შემდეგ, ზურიკო დავითაშვილმა და სხვა ფეხბურთელებმა გულშემატკივრებს მთელი ამ დღეების მანძილზე მხურვალე მხარდაჭერისთვის და მარცხის მიუხედავად გამხნევებისთვის მადლობა გადაუხადეს. დავითაშვილის თქმით, ზღაპარში ფეხბურთელებმა კი არ აცხოვრეს ქომაგი, არამედ პირიქით.

"ქართველი ხალხის ერთიანობა, რომელიც ამ დღეების განმავლობაში ჩვენს გარშემო იყო, ნამდვილად სამაგალითოა და დღის ასეთი დასასრული არაა ის, რაც თქვენ დაიმსახურეთ. საფინალო სასტვენი, ხალხის იდენტური რაოდენობა ტრიბუნებზე და საოცარი მხარდაჭერა მუდამ დარჩება ჩემს გონებაში. მადლობა არის ძალიან სუსტი სიტყვა, რაც გულშემატკივრებისადმი ჩემს და გუნდის მადლიერებას გამოხატავს... ახლა კი საჭიროა თავი ავწიოთ და წინ ვიყუროთ. იქ, სადაც მომავლის ლამაზი დღეები ერთად უნდა შევქმნათ", — თქვა ზურიკო დავითაშვილმა.

რამაზ სვანაძემ კი ოლიმპიადაზე მოხვედრის დარჩენილ შანსზე ისაუბრა და ნაკრების მთელი შემადგენლობის თავდაუზოგავ მუშაობას გაუსვა ხაზი.

"მიმძიმს საუბარი, მაგრამ რაც მოხდა, ფეხბურთის ნაწილია. ვთვლი, რომ ის ბიჭები, რომლებიც ახლა თვალცრემლიანები არიან გასახდელში, მეტს იმსახურებდნენ. ეს მოთამაშეები ქართული ფეხბურთის მომავალი არიან. მათი რწმენა და პროფესიონალიზმი იმედს მიტოვებს. მადლობა გადავუხადე ერთად განვლილი დღეებისთვის. ეს იყო დიდი ზეიმი, გამოწვევა, პასუხისმგებლობა თითოეული ჩვენგანისთვის. ბედნიერი ვარ და მადლობა ღმერთს, რომ ამ ყველაფრის მონაწილე ვიყავი. ოცნებად გვაქვს ოლიმპიურ თამაშებზე თამაში, გვაქვს მცირე შანსი, თუმცა დამოკიდებულები ვართ სხვა შედეგებზე. იმედი მაქვს, მოგვეცემა ოცნების ახდენის შესაძლებლობა", — აღნიშნა მთავარმა მწვრთნელმა.

რაც შეეხება ოლიმპიადის ლიცენზიას, ესპანეთმა დამატებით დროში დაამარცხა შვეიცარია და ისრაელის დარად ნახევარფინალში გავიდა, რაც იმას ნიშნავს, რომ საქართველოს ნაკრებისთვის აუცილებელია დღეს ინგლისმა პორტუგალია დაამარცხოს, ხოლო საფრანგეთმა — უკრაინა და ამ შემთხვევაში, საქართველო და უკრაინა, როგორც მეოთხედფინალში დამარცხებული საუკეთესო ნაკრებები, ერთმანეთში დამატებით მატჩს გამართავენ და გამარჯვებული ოლიმპიადაზე ითამაშებს. საქართველოსა და უკრაინის 21-წლამდელებმა ერთმანეთში ამხანაგურად 2022 წლის ნოემბერში ითამაშეს, მატჩი გორში გაიმართა და 1:1 დასრულდა.

საქართველოს ბანკი ქართული ფეხბურთის და ევროპის ახალგაზრდული ჩემპიონატის მხარდამჭერია.