ალბათ გახსოვთ ის ამბავი, როცა გერმანიაში კლინიკის ერთმა პაციენტმა მეორეს სასუნთქი აპარატი შემაწუხებელი ხმის გამო გამოურთო. საბედნიეროდ, მაშინ ყველაფერი კარგად დამთავრდა, თუმცა, მსგავსი ისტორია ცოტა ხნის წინ აშშ-შიც განმეორდა, შედეგი კი არცთუ სახარბიელო აღმოჩნდა.

საქმე ისაა, რომ ნიუ-იორკის შტატის ერთ-ერთ სასწავლებელში დამლაგებელმა სამაცივრე დანადგარი "გამაღიზიანებელი ხმაურის" გამო გამორთო, რითაც დაწესებულების ათწლეულოვანი ნაკვლევი პირდაპირი მნიშვნელობით წყალში ჩაყარა.

ახლა რენსელიერის პოლიტექნიკური ინსტიტუტი დამლაგებლის დამქირავებელს არასათანადო კადრის აყვანისთვის უჩივის. სასამართლოში შეტანილი სარჩელით, სასწავლებელი ზიანის $1 მილიონზე მეტით ანაზღაურებას მოითხოვს.

როგორც ირკვევა, ლაბორატორიის მაცივარი -80°C-ზე ორგანიზმების კულტურებს ინახავდა, რომლებიც ბიოლოგიისა და ქიმიის პროფესორის 25-წლიანი საკვლევი პროექტის ნაწილი იყო. 2020 წლის შემოდგომაზე, რამდენიმე დღით ადრე, სანამ დამლაგებელი დანადგარს გამორთავდა, სათავსოში ტემპერატურა ცვალებადი გახდა, რასაც გამაფრთხილებელი სიგნალის ჩართვა მოჰყვა. მართალია, მაცივარში მოთავსებული ორგანიზმები ჯერ კიდევ სიცოცხლისუნარიანები იყვნენ, თუმცა, მაშინდელი კოვიდშეზღუდვების გამო, სიტუაციის გამოსწორება დროულად ვერ მოხერხდა. მას შემდეგ, სასწავლებელში სამაცივრე მოწყობილობაზე და შტეფსელთან ბოქლომი დააყენეს, ამასთან, განათავსეს ინფორმაციული დაფაც, რომელიც ადგილზე ხმაურის მიზეზს ხსნიდა.

ამის მიუხედავად, სულ რამდენიმე დღეში, დასუფთავების სამსახურის თანამშრომელმა მაცივარს დენის მიწოდება ავტომატური ამომრთველიდან შეუწყვიტა. შესაბამისად, სათავსოში ტემპერატურამ მოიმატა, მეორე დღეს კი, ლაბორატორიის თანამშრომლებმა განადგურებული კვლევის ნიმუშები აღმოაჩინეს.

უნივერსიტეტის ხელმძღვანელობასთან დამლაგებელმა განაცხადა, რომ გამაფრთხილებელი სიგნალის გაგონებისთანავე მაცივრის ჩართვა სცადა.

"საერთოდ არ ფიქრობდა, რომ რამე დააშავა, ეგონა, გვეხმარებოდა", — წერია სასწავლების სარჩელში.