ლუიზიანას შტატში დააკავეს ქალი, რომელიც სკოლის მოსწავლედ თავის გასაღებისთვის ყალბ დოკუმენტაციას იყენებდა.

როგორც ლუიზიანას შტატის, ნიუ-ორლეანის პოლიციის ოფისში ამბობენ, 46 წლის მართა სერანო-ალვარადოს და მის ქალიშვილ 28 წლის მართა გუტიერეს-სერანოს საჯარო დოკუმენტაციის გაყალბებაში ედებათ ბრალი.

დეტექტივებმა საქმეზე გამოძიება მას შემდეგ დაიწყეს, რაც 29 მაისს უწყებაში მიმართვა შევიდა, რომლის მიხედვითაც ნიუ-ორლეანის ერთ-ერთ საჯარო სკოლაში 2022-2023 სასწავლო წელს სავარაუდოდ სრულწლოვანი ქალი ჩაირიცხა, რომელიც თავს 17 წლის სკოლის მოსწავლედ ასაღებდა.

როგორც მოგვიანებით გაირკვა, დედამ 28 წლის მართა სკოლაში ყალბი დაბადებისა და პირადობის მოწმობის გამოყენებით შეიყვანა. პოლიციის ოფისში დანაშაულის ჩადენის მოტივებზეც საუბრობენ და ამბობენ, რომ მართა სკოლაში სწავლის პერიოდში არავის აწუხებდა, ბავშვებთან ზედმეტი კომუნიკაციის ინიციატივას არ იჩენდა და არც წესრიგს არღვევდა, ამიტომ პოლიცია პედოფილიის მოტივს გამორიცხავს. როგორც გამოძიებამ დაადგინდა, მართას დედა ამერიკაში რამდენიმე წელია უკანონოდ ცხოვრობს, შვილი კი 2021 წელს ჩამოვიდა, რის შემდეგაც მისი მიზანი განათლების მიღება იყო.

"უნდოდა, რომ ინგლისური კარგად ესწავლა და შემდეგ განათლების მიღება გაეგრძელებინა, რაც გასაგებია. მიუხედავად ამისა, არ აქვს მნიშვნელობა, მიზნის მიღწევისთვის არაკანონიერი გზის გამოყენება მართას გადაწყვეტილება იყო, თუ დედამისის, ოფიციალური დოკუმენტების გაყალბება ნებისმიერ შემთხვევაში მიუღებელია", — აცხადებენ პოლიციაში.