ციდან დოლარების ცვენა ალბათ ბევრ ადამიანს უნატრია, მაგრამ ყველას როდი ახდენია ოცნება?! აი, აშშ-ში ორეგონის შტატის რამდენიმე მცხოვრებს კი ეს სურვილი ნამდვილად აუსრულდა, რადგან მათმა თანამოქალაქემ გადაწყვიტა, თავისი ხელგაშლილობა დაემტკიცებინა.

ერთ მშვენიერ სამშაბათ საღამოს ორეგონის შტატის პოლიციამ შეტყობინება მიიღო, რომ უცნობი ადამიანი გზატკეცილზე მიმავალი მანქანიდან ფულს ყრიდა. იგი 38 წლის კოლინ დევის მაკკართი აღმოჩნდა, რომელმაც პოლიციას განუცხადა, რომ ფული "სხვების გასახარებლად" გადაყარა. მან მიზანს ნამდვილად მიაღწია — თანხა ხელში ჩაუვარდა რამდენიმე იღბლიან ჩამვლელს, რომლებმაც საგანგებოდ ამისთვის გააჩერეს მანქანები. ადგილი კი ერთ საათში სრულიად მოსუფთავდა — დარჩენილი კუპიურები შემთხვევის ადგილიდან პოლიციამ ამოიღო.

ადგილობრივი გამოცემების ცნობით, მაკკართიმ $100-დოლარიანი კუპიურები გადაყარა. მართალია, ზუსტი რიცხვი უცნობია, მაგრამ ახალგაზრდა კაცის თქმით, განიავებული თანხა $200 ათასს აღწევდა. პოლიციის ვარაუდით, გადაყრილი ფული მთლად ამხელა რიცხვს არ შეადგენს, თუმცა, მაინც რამდენიმე ათასი დოლარია.

იმ ხალხისგან განსხვავებით, ვინც ფული იპოვა, მაკკართის ოჯახი სულაც არაა გახარებული. მათი თქმით, კოლინმა საერთო საბანკო ანგარიშიდან გამოიტანა თანხა და ოჯახი სულ მთლად უფულოდ დატოვა.

პოლიციის თქმით, ოჯახი თანხის სამართლებრივად დაბრუნებას ვეღარ შეძლებს, რადგან ანგარიში საერთო იყო, ამიტომ ფულის გამოტანის უფლება მის ნებისმიერ მფლობელს ჰქონდა.

ამდენად, კოლინის ოჯახი ახლა მხოლოდ გამვლელების გულისხმიერების იმედადღაა დარჩენილი — ისინი მოელიან, რომ ამბის გახმაურების შემდეგ იღბლიანი უცნობები თანხას დააბრუნებენ.

პოლიციამ კი მაკკართის მხოლოდ გაფრთხილება მისცა, რომ სამომავლოდ გზატკეცილზე სიბნელეში ფულის გადაყრით სხვებს საფრთხე არ შეუქმნას.