დღეს დილიდან სხვადასხვა წყარო ავრცელებდა ინფორმაციას, რომ აზერბაიჯანი და სომხეთი ცეცხლის შეწყვეტაზე შეთანხმდნენ. მოგვიანებით, ეს რუსეთმა ოფიციალურად დაადასტურა, თუმცა ადგილობრივი მედიები წერენ, რომ სროლის ხმა ისევ ისმის.

რატომ არის მნიშვნელოვანი: 12 სექტემბერს აზერბაიჯანსა და სომხეთს შორის ვითარება ისევ დაიძაბა. სომხეთის თავდაცვამ განაცხადა, რომ გვიან ღამით, აზერბაიჯანმა ინტენსიურად დაიწყო სროლა მათი ქალაქების — გორის, სოტკისა და ჯერმუკის მიმართულებით.

• აზერბაიჯანის თავდაცვის უწყებამ თქვა, რომ სომხეთის შეიარაღებული ძალებმა მოაწყვეს პროვოკაცია და დივერსიულმა ჯგუფებმა დანაღმეს ტერიტორიები აზერბაიჯანის პოზიციებსა და მომარაგების გზებს შორის.
• მათვე უარყვეს ინფორმაცია სომხური სამოქალაქო ობიექტების დაბომბვის შესახებ და განაცხადეს, რომ "კონტრზომები ადგილობრივი ხასიათისაა და მიმართულია ლეგიტიმური სამხედრო სამიზნეების წინააღმდეგ".
• დაპირისპირებას ორივე მხარეს მსხვერპლი მოყვა — აზერბაიჯანს ჯერ ოფიციალური ციფრი არ გაუვრცელებია, სომხეთის პრემიერმინისტრმა კი განაცხადა, რომ დაიღუპა 49 ადამიანი.

შეთანხმება: რუსეთის საგარეო საქმეთა სამინისტრო აცხადებს, რომ 13 სექტემბერს, დილით მათი ჩართულობით შეთანხმება შედგა. რუსეთიმა მოუწოდა მხარეებს, თავი შეიკავონ სიტუაციის შემდგომი ესკალაციისგან და მკაცრად დაიცვან შეთანხმება.

• თუმცა სომხეთის თავდაცვის სამინისტროს ცნობით, დაბომბვის ინტენსივობის შემცირების მიუხედავად, აზერბაიჯანი აგრძელებს პოზიციური წინსვლის მცდელობებს და სიტუაცია "უკიდურესად დაძაბულია".
• გარდა ამისა, გორისში ჟურნალისტებმა განაცხადეს, რომ შუადღეზე ქალაქის მახლობლად ახალი დარტყმების და საარტილერიო ცეცხლის ხმა ისმოდა.
• მათივე თქმით, ცეცხლის შეწყვეტის შეთანხმება არ შესრულებულა არც სოტკთან, სადაც დარტყმები მთელი დილის განმავლობაში გაგრძელდა.
• ამ ეტაპზე აზერბაიჯანს ოფიციალური კომენტარი არ გაუკეთებია.

საერთაშორისო გამოხმაურება: სომხეთმა დახმარებისთვის რუსეთს, CSTO-სა (ОДКБ) და გაეროს უშიშროების საბჭოს მიმართა. CSTO-სგან მათ მოითხოვეს, დაუყოვნებლივ მიიღოს ზომები, რომლებიც გამომდინარეობს სახელშეკრულებო ვალდებულებებიდან — როგორც ცნობილია, უკვე მუდმივმოქმედი საბჭოს სხდომა მიმდინარეობს.

• კავკასიასა და ცენტრალურ აზიაში ნატოს გენერალური მდივნის სპეციალურმა წარმომადგენელმა ხავიერ კოლომინამ შეშფოთება გამოთქვა — ალიანსმა მოუწოდა მხარეებს საომარი მოქმედებების დაუყოვნებლივ შეწყვეტისა და სიტუაციის დეესკალაციისკენ.
• კრემლის პრესსპიკერის თქმით, "პუტინი ყველა ღონეს ხმარობს" სომხეთ-აზერბაიჯანის საზღვარზე დაძაბულობის განსამუხტად.
• ნიკოლ ფაშინიანი ევროპული საბჭოს პრეზიდენტს, შარლ მიშელს ესაუბრა, რომელმაც განაცხადა, რომ რეგიონში მშვიდობასა და სტაბილურობას ალტერნატივა არ აქვს.
• ფაშინიანს ელაპარაკა ირაკლი ღარიბაშვილიც — მთავრობის ადმინისტრაციის ინფორმაციით, სომხეთის პრემიერმა მას მორიგ სამხედრო გამწვავებასა და დაპირისპირების შედეგად შექმნილ ვითარებაზე ინფორმაცია მიაწოდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.