უკრაინის საგარეო საქმეთა მინისტრმა, დმიტრო კულებამ Twitter-ზე იმედგამაცრუებელი უწოდა გერმანიის ამ ნაბიჯს.

რატომ არის მნიშვნელოვანი: 29 აგვისტოს შემდეგ ომის ახალი და მნიშვნელოვანი ფაზა დაიწყო — უკრაინა კონტრშეტევაზე გადავიდა და ამ დრომდე წარმატებით მიიწევს წინ.

  • ექსპერტები და მსოფლიო ლიდერები ხაზს უსვამენ, რომ ბრძოლის ველზე მსგავსს პროგრესში დიდი გავლენა სწორედ დასავლურ იარაღებსა და დახმარებას ჰქონდა;
  • თუმცა მეორე მხრივ, ბრძოლა გრძელდება, ხოლო უკრაინას მეტი და უფრო ძლიერი იარაღი სჭირდება.

დეტალები: კულებას თქმით, ერთი რაციონალური არგუმენტიც არ არსებობს, რატომ არ აპირებს გერმანია Leopard-ისა და Marder-ის ტიპის საბრძოლო ტანკებისა და ქვეითთა საბრძოლო მანქანების მიწოდებას.

  • "მხოლოდ აბსტრაქტული შიშები და საბაბები";
  • "რისი ეშინია ბერლინს, რისიც არ ეშინია კიევს?".

რა მოხდა: გერმანიის თავდაცვის მინისტრი, ქრისტინე ლამბეხტი ამ საბრძოლო ტექნიკის მიწოდებაზე უარს აცხადებს და არგუმენტად იმას ამბობს, რომ ისინი არცერთ ქვეყანას არ მიუწოდებია.

  • პარალელურად, ოლაფ შოლცი აღნიშნავს, რომ გერმანიის მიერ აქამდე მიწოდებული იარაღები დიდ განსხვავებას ქმნის ბრძოლის ველზე;
  • ის ხაზს უსვამს, რომ სანამ საჭიროება არსებობს, ბერლინი უკრაინის დახმარებას გააგრძელებს.