სახელმწიფო უსაფრთხოების სამსახურის ყოფილი მაღალჩინოსანი მორიგ წერილში ახალ ბრალდებას აყენებს.

რატომ არის მნიშვნელოვანი: სოსო გოგაშვილი წერს, რომ ელჩობის ორი კანდიდატი "აგენტურულ ბაზაში (სუკი)" ირიცხებოდა, რის გამოც მათი დანიშვნის შეჩერების დავალება გასცა.

  • მისი თქმით, იმის გასარკვევად, თუ რა ხდებოდა, დაბლოკილმა კანდიდატებმა საგარეო საქმეთა სამინისტროს მიაკითხეს, შეაწუხეს თავიანთი "პატრონი", რომელმაც ივანიშვილსა და კვირიკაშვილს დაურეკა;
  • გოგაშვილის მტკიცებით, ამის შემდეგ ის ვახტანგ გომელაურმა დაიბარა და მიზეზი ჰკითხა და უთხრა: "შეფმა ცალკე დამირეკა და კვირიკაშვილმა ცალკე ამ საქმეზეო".
  • "ერთის რეკომენდატორი ყოფილა გოგა ხაინდრავა და დეტალურად გამირკვიე რა ხდებაო. მე მას ავუხსენი ყველაფერი და გავაცანი ოპერატიული ცნობა აგენტების შესახებ, მან მითხრა, რომ ცნობა დამეხია და ორივეზე გამეშვა თანხმობა საგარეო საქმეთა სამინისტროში, რაც მე შესაბამისად შევასრულე".

დეტალები: გოგაშვილი ამბობს, რომ სანამ საგარეო საქმეთა სამინისტრო რომელიმე ქვეყანაში საქართველოს ელჩს ან დიპლომატიური სტატუსის მქონე ნებისმიერ კანდიდატს წარადგენს, უწყება სუსში აგზავნის დასანიშნი კანდიდატების სიას.

  • მისი თქმით, სუსის ფუნქციაა, გადაამოწმოს კანდიდატი და თუ ის სუსის აგენტურულ ბაზაში ირიცხება ან მტრულად განწყობილ სახელმწიფოსთან საეჭვო კავშირები აქვს, დაუყოვნებლივ იბლოკება.
  • "ამ "ელჩების" გადანიშვნის პერიოდი, ჩემი ვარაუდით, ახლა უწევს და არ არის გამორიცხული, ეს უკვე პრეზიდენტის მაგიდაზე იდოს";
  • გოგაშვილი ამბობს, რომ სურვილის შემთხვევაში, პრეზიდენტის წარმომადგენელს ან დეპუტატებს, რომლებსაც მსგავს ინფორმაციაზე წვდომა აქვთ, კონკრეტულ გვარებს მიაწვდის.

გოგაშვილი აცხადებს, რომ ამ "ინციდენტის" შემდეგ გოგა ხაინდრავა გადაემტერა.

  • მისი თქმით, საზოგადოებას კიდევ მიაწვდის ინფორმაციას ორი "ინციდენტის" შესახებ, რომელიც ადამიანების უფლებების დარღვევებს ეხება.