ISW ახალ ანგარიშში უკრაინის კონტრშეტევის წარმატებაზე საუბრობს და აღნიშნავს, რომ ამას მნიშვნელოვანი გავლენა აქვს ოკუპანტების საბრძოლო სულისკვეთებასა და სამხრეთის მიმართულებით სამხედრო შესაძლებლობებზე.

რატომ არის მნიშვნელოვანი: 29 აგვისტოს უკრაინა კონტრშეტევაზე გადავიდა და ამ დროისთვის უკვე აქვს გარკვეული წარმატება, როგორც სამხრეთში ასევე აღმოსავლეთით.

  • ISW-ის ცნობით, 5 დღეში უკრაინამ იმაზე მეტი ტერიტორია გაათავისუფლა, ვიდრე რუსეთმა აპრილის შემდეგ დაიპყრო.

დეტალები: ISW სატელიტის ფოტოებზე დაყრდნობით წერს, რომ ხერსონის ჩრდილო-დასავლეთით 15 კილომეტრში მდებარე კისელივკაში 4 რუსული ტრანსპორტის გარდა, წინა პოზიციები ყველამ დატოვა.

  • მათი თქმით, ეს ემთხვევა ცნობებს, რომ დონეცკის ე.წ. სახალხო რესპუბლიკის ჯარებმა კისელივკა მიატოვეს და მდინარე დნიპროს მიმართულებით წავიდნენ;
  • ომის ინსტიტუტი მიუთითებს, რომ ხერსონის გარშემო კისელივკა რუსული ძალებისთვის ოპერატიულად მნიშვნელოვანი მდებარეობაა.

გუშინ უკრაინის თავდაცვამ სამხრეთით გათავისუფლებული დასახლებების სია გამოაქვეყნა.

  • თავდაცვის სამინისტროს განცხადებით, სამხრეთში გაათავისუფლეს ხუთი დასახლებული პუნქტი;
  • უწყება საუბრობს, რომ დროებით ოკუპირებულ ხერსონშიც, ხარკოვის მსგავსად, რუსეთი "გადაჯგუფებებისთვის" ემზადება;
  • ცნობილი გახდა ისიც, რომ უკრაინამ სამხრეთით უკვე 500 კვადრატული კილომეტრის ტერიტორია დაიბრუნა.