ამის შესახებ ინფორმაციას OC Media-ს ავრცელებს.

რატომ არის მნიშვნელოვანი: 12 სექტემბერს დილით გავრცელდა ინფორმაცია, რომ აზერბაიჯანულმა მხარემ ცეცხლი გაუხსნა მთიან ყარაბაღის ორ დასახლებას — კარმირ შუკასა და თაღავარდს.

  • აზერბაიჯანის თავდაცვის სამინისტრო კი ამტკიცებდა, რომ სომხეთის შეიარაღებული ძალები რამდენიმე დღეა აზერბაიჯანის პოზიციების მიმართულებით ისვრიან, რასაც სომხეთის უარყოფდა;
  • საღამოს კი ცნობილი გახდა, რომ აზერბაიჯანი სომხეთის 3 ქალაქს ინტენსიურად ბომბავს.

დეტალები: მიმდინარე მოვლენებთან დაკავშირებით სომხეთის პრემიერმინისტრმა, ნიკოლ ფაშინიანმა ქვეყნის უშიშროების საბჭო მოიწვია.

  • სხდომაზე მიიღეს გადაწყვეტილება, რომ დახმარებისთვის კოლექტიური უსაფრთხოების ხელშეკრულების ორგანიზაციას, რუსეთსა და გაეროს უშიშროების საბჭოს მიმართონ;
  • რუსეთსა და სომხეთს ორმხრივი თავდაცვითი პაქტი აქვთ და CSTO-ს წევრები არიან.

აშშ სომხეთსა და აზერბაიჯანს საომარი მოქმედებების დაუყოვნებლივ შეწყვეტისკენ მოუწოდებს.

  • სახელმწიფო დეპარტამენტის განცხადებაში აღნიშნულია, რომ აშშ ღრმად შეშფოთებულია სომხეთ-აზერბაიჯანის საზღვარზე შეტაკებების ცნობების შესახებ.

აზერბაიჯანი სომხეთის მხრიდან პროვოკაციაზე და დეზინფორმაციაზე საუბრობს, დაბომბვაზე გავრცელებულ ინფორმაციას კი აბსურდს უწოდებს.

  • თავდაცვის სამინისტროს ცნობით, სომხეთის შეიარაღებული ძალების დივერსიულმა ჯგუფებმა სიბნელეში, მთიანი რელიეფისა და ხეობების გამოყენებით, დანაღმეს ტერიტორიები აზერბაიჯანის პოზიციებსა და მომარაგების გზებს შორის.
  • "ჩვენი ქვედანაყოფების მიერ ამ ქმედებების აღსაკვეთად გადაუდებელი ზომების შედეგად, მოხდა სამხედრო შეტაკება", — განაცხადეს სამინისტროში და დასძინეს, რომ სომხურ მხარეს პერსონალის დანაკარგები აქვს და სამხედრო ინფრასტრუქტურაც დაზიანდა.
  • გარდა ამისა, ბაქო უარყოფს ინფორმაციას მათი თვითმფრინავის ჩამოგდების შესახებ.

სომხეთი კი აცხადებს, რომ აზერბაიჯანის შეიარაღებული ძალების ქვედანაყოფებმა საარტილერიო საშუალებებიდან და მსხვილკალიბრიანი შაშხანებიდან ინტენსიური სროლა დაიწყეს სომხეთის პოზიციებზე გორის, სოტკისა და ჯერმუკის მიმართულებით.

  • გარდა ამისა, რადიო თავისუფლების სომხური ბიურო წერს, რომ სომხეთ-აზერბაიჯანის საზღვარზე მყოფი რამდენიმე თემის, მათ შორის სიუნიქის, ვაიოც ძორისა და გეღარქუნიკის რეგიონის მცხოვრებლები სროლისა და დაბომბვის შესახებ იტყობინებიან.
  • გამოცემას სოფელ ვერინ შორჟას გამგებელმა განუცხადა, რომ აზერბაიჯანის არმიამ "ინტენსიური ცეცხლი გახსნა".