პოლონეთის პრემიერმინისტრმა, მათეუშ მორავიეცკიმ განაცხადა, რომ უკრაინაში ტანკები გაგზავნეს. მისი თქმით, დამატებით ინფორმაციას გაავრცელებს "თავის დროზე", მაგრამ ამ დროისთვის ის არ ასახელებს რამდენი ტანკი მიაწოდეს უკრაინას.

რამდენიმე კვირაა ვრცელდება ინფორმაცია, რომ პოლონეთი უკრაინას საბჭოთა პერიოდის T-72 ტანკებით ამარაგებს. თავდაცვის სამინისტრომ ამ საკითხზე კომენტარის გაკეთებაზე უარი თქვა.

ამასთანავე, მორავიეცკიმ თქვა, რომ უკრაინისთვის საბჭოთა პერიოდის MiG-29 ტიპის საბრძოლო თვითმფრინავების მიწოდების საკითხი ახლა დახურულია. მარტში პოლონეთმა განაცხადა, რომ მზად იყო თვითმფრინავები გერმანიაში, აშშ-ის რამშტეინის საჰაერო ბაზაზე განეთავსებინა და გადაეცა ისინი ამერიკელი სამხედროების განკარგულებაში, მაგრამ ვაშინგტონმა უარყო შეთავაზება.