ექსეტერისა და ოქსფორდის უნივერსიტეტების სტუმრებმა ცოტა ხნის წინ ახალი კვლევის შედეგი გამოაქვეყნეს, რომელიც ბავშვების ცხოველებისადმი დამოკიდებულებასა და სპეცისიზმს ეხება. კვლევის შედეგების მიხედვით, პატარები თვლიან, რომ ფერმის ცხოველები ადამიანების მსგავსად უნდა მოვექცეთ, თუმცა ამ აზრს გაზრდის შემდეგ იცვლიან.

მკლევრებმა აღნიშნულ საკითხებზე ბრიტანელთა სამი ჯგუფი გამოკითხეს. პირველ ჯგუფში 9-11 წლის ბავშვები, მეორეში — 18-21 წლის ახალგაზრდები, მესამეში კი წინა ჯგუფთან შედარებით უფროსი ზრდასრულები გააერთიანეს.

სხვა დავალებებთან და კითხვებთან ერთად, კვლევაში მონაწილეებს ფერმის ცხოველები და სახლის ცხოველები (ძაღლები, კატები და სხვ) აჩევენეს და სთხოვეს, ისინი შემდეგ კატეგორიებში გადაენაწილებინათ: "საჭმელი", "შინაური ცხოველი" და "ნივთი". მათ ასევე ჰკითხეს, თუ როგორ ექცევიან და როგორ უნდა მოექცნენ ადამიანები ცხოველებს.

კვლევის შედეგების მიხედვით, ბავშვები მიიჩნევენ, რომ ძაღლებს ღორებზე უკეთესად უნდა მოვექცეთ, თუმცა ღორებსა და ადამიანებს განსხვავებულად არ უნდა მოვეპყრათ. ზრდასრულებმა ერთმანეთს ადამიანები და ძაღლები გაუთანაბრეს, თუმცა განაცხადეს, რომ მათ ღორებზე უკეთ უნდა მოვექცეთ. ამასთან, ბავშვები ხორცის ჭამას უფრო მიუღებლად თვლიან, ვიდრე ზრდასრულები.

"ადამიანების ცხოველებთან ურთიერთობა ორმაგი ეთიკური სტანდარტებითაა სავსე. ზოგიერთ ცხოველს კომპანიონად მივიჩნევთ, სხვები კი ფერმაში გვყავს ფინანსური მოგების მისაღებად. სახეობაზეა დამოკიდებული ის, თუ როგორ ვექცევით ცხოველებს: ძაღლები ჩვენი მეგობრები არიან, მაგრამ ღორებს საჭმელად ვთვლით", — აცხადებს კვლევის ავტორი ლუკ მაგუაირი.

კვლევის მიხედვით, ადამიანები ხშირად ურთიერთსაწინააღმდეგო შეხედულებებითა და ორმაგი მორალური სტანდარტებით ცხოვრობენ. ცხოველების მიმართ მსგავსი დამოკიდებულების მიზეზები ჯერ კარგად შესწავლილი არაა, თუმცა აღნიშნული კვლევა სწორედ ერთ-ერთი პირველი მტკიცებულებაა იმისა, რომ შეხედულებებს შორის განსხვავება ასაკზეცაა დამოკიდებული.

"მოზრდილობისას აშკარად რაღაც იცვლება, რის შედეგადაც ბავშვების ცხოველებისადმი სიყვარული რთულდება და სპეცისიზმი ვითარდება", — ამბობს მაგუაირი.