ევროპარლამენტმა საქართველოს მიერ ასოცირების შეთანხმების შესრულებასთან დაკავშირებით ახალი ანგარიში გამოაქვეყნა, რომელიც 2020-2022 წლების პერიოდს მოიცავს. ანგარიშში ვკითხულობთ, რომ 2020 წლიდან საქართველომ იმ დემოკრატიული პრინციპებისა და პოლიტიკური ვალდებულებების კუთხით, რომლებიც ასოცირების შეთანხმების ფარგლებში აიღო, უკან დაიხია.

"მკვეთრი პოლიტიკური პოლარიზაციის კონტექსტში, დემოკრატიული ინსტიტუტები საკუთარ არსს კარგავენ, მმართველი კოალიცია კი საკუთარ ძალაუფლებას სულ უფრო მეტად ზრდის და ზღუდავს სივრცეს განსხვავებული აზრისთვის", — წერია ანგარიშში.

ევროპარლამენტის ანგარიშის მიხედვით, კვლევის პერიოდში საქართველოში მნიშვნელოვვნად გაუარესდა კანონის უზენაესობა, რასაც ადასტურებს ოპოზიციის ლიდერების დაკავებები, 2019 წლის ივნისისა და 2021 წლის ივლისის ძალადობრივი ინციდენტების არაეფექტური გამოძიება და, ასევე, სახელმწიფო ინსპექტორის სამსახურის გაუქმება.

დოკუმენტში საუბარია მოსამართლეთა გაუმჭირვალედ და ნაჩქარევად დანიშვნაზე, გენერალური პროკურორის დანიშვნის რეფორმის არგანხორციელებასა და საერთო სასამართლოების შესახებ კანონში ცვლილებებზე და აღნიშნულია, რომ ამ მოვლენებმა ხელი შეუშალა ასოცირების ხელშეკრულების იმპლემენტაციას.

კორუფციასთან დაკავშირებით ანგარიშში ვკითხულობთ, რომ საქართველო რჩება რეგიონულ ლიდერად კორუფციასთან ბრძოლის კუთხით, თუმცა ბოლო წლებში შენელდა ანტიკორუფციული რეფორმები, მაღალი დონის კორუფციის ეფექტური გამოძიება და სისხლის სამართლებრივი დევნა მთავარ გამოწვევად რჩება.

რაც შეეხება მედიაგარემოს, ევროპარლამენტის ანგარიშში წერია, რომ პოლიტიკური ჩარევების, ფიზიკური და სიტყვიერი თავდასხმების გამო საქართველოში ჟურნალისტებისთვის სამუშაო გარემო უფრო რთული გახდა.

დოკუმენტში აღნიშნულია, რომ დაკვირვების პერიოდში საქართველოში მნიშვნელოვანი ნაბიჯები გადაიდგა ქალთა მიმართ ძალადობის შესამცირებლად, ასევე მნიშვნელოვანი ნაბიჯი იყო ბავშვთ უფლებათა კოდექსის ძალაში შესვლა, თუმცა მთავარ პრობლემად რჩება სექსუალური უმცირესობების უფლებები და მათ მიმართ განხორციელებული დისკრიმინაცია.

ანგარიშში მიმოხილულია ექსპრეზიდენტ მიხეილ სააკაშვილის საქართველოში ჩამოსვლა და მისი დაკავება. საერთაშორისო ორგანიზაციებზე დაყრდნობით, ანგარიშში ნათქვამია, რომ მიხეილ სააკაშვილის გარშემო განვითარებული მოვლენები არამხოლოდ შერჩევითი სამართალი, არამედ აშკარა პოლიტიკური შურისძიება იყო და ამას ადასტურებდა ქართული ოცნების ლიდერების, მათ შორის პრემიერმინისტრ ირაკლი ღარიბაშვილის განცხადებებიც, რომლებიც სააკაშვილს ბრალის დამძიმებით დაემუქრნენ. ანგარიშში ნათქვამია, რომ ეს ყოველივე ადასტურებს პოლიტიკურ ჩარევას მართლმსაჯულების სისტემაში.

დოკუმენტში, ასევე, საუბარია 5 ივლის განვითარებულ მოვლენებზე და ნათქვამია, რომ საქართველოს ხელისუფლებამ ეფექტურად ვერ უზრუნველყო შეკრებილთა დაცვა და უსაფრთხოება.

ევროპარლამენტის ანგარიშში ნათქვამია, რომ საქართველო ასრულებს უვიზო რეჟიმთან დაკავშირებულ ძირითად მოთხოვნებს და ეფექტურად თანამშრომლობს ევროკავშირის სტრუქტურებსა და წევრ ქვეყნებთან კრიმინალთან ბრძოლის წინააღმდეგ. მასში დადებითადაა შეფასებული საქართველოს თანამშრომლობა საგარეო და უსაფრთხოების პოლიტიკის თვალსაზრისით, თუმცა აღნიშნულია, რომ საქართველომ უარი თქვა შეერთებოდა რუსეთის წინააღმდეგ დაწესებულ საქნციებს უკრაინაში შეჭრის შემდეგ.