სტამბოლში რუსეთ-უკრაინის დღევანდელი მოლაპარაკებების დაწყებამდე, უკრაინის საგარეო საქმეთა მინისტრმა, დმიტრო კულებამ უკრაინის დელეგაციის წევრებს ურჩია, რომ არაფერი ჭამონ და დალიონ. BBC-ის ცნობით, ამის შესახებ მან უკრაინულ საინფორმაციო არხ უკრაინა 24-თან ინტერვიუში განაცხადა.

"არაფერი არ ჭამოთ და არ დალიოთ, სასურველია მოერიდოთ რაიმე ზედაპირთან შეხებას", — თქვა კულებამ.

გუშინ, 28 მარტს Wall Street Journal-მა გაავრცელა ინფორმაცია, რომ რუს ოლიგარქ რომან აბრამოვიჩს და მასთან მოლაპარაკებებზე მყოფ უკრაინის დელეგაციის წევრებს მოწამლვლის სიმპტომები ჰქონდათ.

BBC-ის ცნობით აბრამოვიჩის მოწამვლა დაადასტურეს მასთან დაახლოებულმა პირებმა. ხოლო, უკრაინის დელეგაციის წევრმა მოწამვლის შესახებ ინფორმაცია უარყო. ამასთანავე, უკრაინის პრეზიდენტის ადმინისტრაციის უფროსის მრჩეველმა, მიხაილო პოდოლიაკმა განაცხადა, რომ მოლაპარაკებების ჯგუფის ყველა წევრი ჩვეულ რეჟიმში მუშაობს.

Wall Street Journal-ის ცნობით, რამდენიმე წყარო ამ ინციდენტში კრემლს ადანაშაულებს და ამბობენ, რომ მათ მოლაპარაკებების ჩაშლა სურდათ. მედია წერს, რომ როგორც აბრამოვიჩთან დაახლოებულმა პირმა თქვა, მათ არ იციან ვისი სამიზნე გახდა აღნიშნული ჯგუფი.