უკრაინაში რუსეთის შეჭრის შემდეგ ორლანდო ბლუმი ერთ-ერთია იმ ადამიანთაგან, რომლებიც უკრაინელ ლტოლვილებს მხარს უჭერენ და ეხმარებიან. 45 წლის მსახიობმა, რომელიც UNICEF-თან ერთად უკრაინელ ლტოლვილებს ეხმარება, ფოტოები გააზიარა, რომლებშიც მოლდოვის საზღვარზე მყოფ უკრაინელ დედასა და მის სამ შვილს ხვდება.

"უკრაინის ომის შედეგად თითქმის ყოველ წამში ერთი ბავშვი მაინც ლტოლვილი ხდება. მე მოლდოვაში ვარ და UNICEF-ის მხარდაჭერით უკრაინელ ოჯახებს ვხვდები, რომლებიც იძულებულები გახდნენ, რომ უსაფრთხო ადგილის საძებნელად სამშობლო დაეტოვებინა", — წერს ბლუმი თავის ინსტაგრამზე.

ორლანდო ბლუმი, რომელიც 2009 წლიდან UNICEF-ის კეთილი ნების ელჩია, ახლა უამრავ უკრაინელ ლტოლვილს ხვდება. "დღეს უკრაინელ დედასა და მის სამ შვილს შევხვდი, რომლებმაც მეზობლის სახლის დაბომბვის შემდეგ ქვეყანა დატოვეს. მათ არ იციან, სად წავიდნენ და დედას მხოლოდ ის სურს, რომ მისი შვილები უსაფრთხოდ იყვნენ. ომის დაწყებიდან უკვე 1 თვე გავიდა და ყოველდღიურად ათასობით ოჯახი უკრაინას მოლდოვას საზღვრის გადაკვეთით ტოვებს", — დასძინა მსახიობმა.

ორლანდო ბლუმის პოსტს თავისი პარტნიორი და მომღერალი კეტი პერი გამოეხმაურა. "მადლობა, რომ შესანიშნავი ადამიანი ხარ", — წერს კეტი პერი ორლანდოს პოსტის კომენტარებში.