პრემიერმინისტრი, ირაკლი ღარიბაშვილი მთავრობის გადადგომის მოთხოვნით გამართულ აქციებს ანტისახელმწიფოებრივს უწოდებს. მისი თქმით, რუსეთ-უკრაინის ომის დროს მთავრობის გადადგომა საქართველოს გარდა სხვა არცერთ ქვეყანაში არ მოუთხოვიათ.

"სამწუხარო რეალობაა, რომ მთელ მსოფლიოში არცერთ ქვეყანაში, ისეთ ვითარებაში, რომელიც ახლა არის უკრაინაში, ანუ რუსეთ-უკრაინის ომის დროს, არცერთ ქვეუყანაში არ გამართულა საპროტესტო აქციები და არ მოუთხოვიათ მთავრობის გადადგომა. და მითუმეტეს, ჩვენი სიტუაცია არის განსაკუთრებული და უნიკალური და რას ვგულისხმობ — ჩვენ ვართ ოკუპირებული, ჩვენი ქვეყნის 20% არის ოკუპირებული და რუსის ჯარი დგას ჩვენს ტერიტორიაზე.

ჩვენ ვცხოვრობთ რუსულ ჯართან ერთად და ამ დროს, ამ ვითარებაში როცა სიტუაცია არის ძალიან არაპროგნოზირებადი, მოწყვლადი სიტუაცია არის მთელი რეგიონის და მთელი ევროპის მასშტაბით, რა თქმა უნდა, სრულად მიუღებელი და გაუგებარი იყო, აი, ეს ანტისახელმწოფოებრივი აქციები, რომელიც იმართებოდა", — თქვა მან.

ღარიბაშვილი ამბობს იმასაც, რომ ეს აქციები იმ ძალების მიერ იყო ორგანიზებული, ვინც წლებია ქვეყანაში "ანტისახელმწოფოებრივ და ანტიეროვნულ" პოლიტიკას ატარებს.

"რა თქმა უნდა, ეს არის მოღალატეობრივი პოლიტიკა. ეს არის მე-5 კოლონა, ეს არის შულავერის კომიტეტი, რომელიც საქართველოში მოქმედებს, ამიტომ, ჩვენ ამას არ დავუშვებთ", — აღნიშნა მან.

უკრაინის მხარდამჭერ აქციაზე მთავრობის გადადგომის მოთხოვნა რუსეთის უკრაინაში შეჭრის შემდეგ ირაკლი ღარიბაშვილის განცხადებებს მოჰყვა. ღარიბაშვილმა 25 თებერვალს განაცხადა, რომ საქართველო რუსეთის სანქციებს არ დაუწესებს. იგივე გაიმეორა 28 თებერვალსაც და ამტკიცებდა, რომ ეს "ეროვნულ ინტერესებს დააზიანებს".