24 თებერვალს რუსეთი უკრაინაში შეიჭრა და ომი წამოიწყო. რუსეთის ქმედებას მსოფლიოს ლიდერები, ორგანიზაციის წარმომადგენლები და ცნობილი ადამიანები გამოეხმაურნენ. მათ შორისაა ლეგენდარული უკრაინელი ფეხბურთელი ანდრეი შევჩენკო, რომელმაც უკრაინის მხარდაჭერის თხოვნით სან სიროს სტადიონზე შეკრებილ ფეხბურთელებსა და გულშემატკივრებს მიმართა.

ვიდეო "მილანისა" და "ინტერის" მატჩის წინ დიდ ეკრანზე გავიდა. მოგვიანებით კი შევჩენკოს მოწოდება "მილანის" ოფიციალურმა ტვიტერის ანგარიშმაც დადო.

"ჩემო იტალიელო მეგობრებო, სან სიროს სტადიონიდან გთხოვთ, რომ უკრაინაში მშვიდობას მხარი დაუჭიროთ. უკრაინელებს მშვიდობა უნდათ, რადგან მშვიდობას საზღვარი არ აქვს და რადგან ის, რაც გვაერთიანებს, ჩვენი დაყოფის მიზეზზე ძლიერი უნდა იყოს. მოდი, ერთად შევაჩეროთ ომი", — აცხადებს ფეხბურთელი.

შევჩენკოს ვიდეოში უკრაინის დროშა აქვს მოხვეული. ფეხბურთელი რამდენიმე დღის წინ ლონდონში, ტრაფალგარის მოედანზე უკრაინის მხარდასაჭერ აქციაზეც გამოვიდა.

აღსანიშნავია, რომ 45 წლის ფეხბურთელი კარიერის განმავლობაში "დინამო კიევში", "მილანში", "ჩელსისა" და უკრაინის ეროვნულ ნაკრებში თამაშობდა.