პრემიერმინისტრი, ირაკლი ღარიბაშვილი რუსეთის უკრაინაზე თავდასხმას ეხმაურება და აცხადებს, რომ სუვერებულ სახელმწიფოზე სამხედრო თავდასხმა მიუღებელია. პრემიერმინისტრმა უკრაინაში რუსულ აგრესიასთან დაკავშირებით განცხადება სამხედრო ესკალაციიდან 5 საათის შემდეგ გააკეთა.

"ჩვენ ვდგავართ უკრაინასთან. სამხედრო თავდასხმა სუვერენულ სახელმწიფოზე მიუღებელია. მოვუწოდებთ საერთაშორისო საზოგადოებას, მიიღონ ყველა შესაძლო ზომა, რათა შეაჩეროს საერთაშორისო წესრიგის აშკარა დარღვევა და თავიდან აიცილოს შემდგომი სამხედრო ესკალაცია", — წერს პრემიერმინისტრი ტვიტერზე.

აქვე აღსანიშნავია, რომ მიუხედავად არაერთი მოწოდებისა, საქართველოს მთავრობის წარმომადგენლები გაზრდილი დაძაბულობის ფონზე ერთხელაც არ ჩასულან კიევში, რათა უკრაინელების მიმართ საქართველოს სოლიდარობა დაედასტურებინათ, მხარდამჭერ რეზოლუციაში კი ოკუპანტი ქვეყნის სახელი არ ახსენეს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: