პროკურატურის განცხადებით, ტრანსნაციონალური ორგანიზებული დანაშაულებრივი ჯგუფის 5 წევრი დააკავეს, რომლებმაც ქოლ-ცენტრი მოაწყვეს და გერმანიის ფედერაციული რესპუბლიკისა და სხვა ქვეყნების მოქალაქეების კუთვნილ დიდი ოდენობით თანხებს დაეუფლნენ.

"სამიზნეს ევროპის სხვადასხვა ქვეყანაში მცხოვრები მოქალაქეები იყვნენ. ე.წ. ქოლ-ცენტრის თანამშრომლები, წინასწარ შემუშავებული გეგმის შესაბამისად, უკავშირდებოდნენ გერმანიის ფედერაციული რესპუბლიკის და სხვა ქვეყნების მოქალაქეებს, ეცნობოდნენ გამოგონილი სახელებით, მათი კომპანიის ადგილსამყოფელის შესახებ აწვდიდნენ ყალბ ინფორმაციას და სთავაზობდნენ ფასიანი ქაღალდების, აქციების, სასაქონლო აქტივების, ვალუტების და კრიპტოვალუტების ელექტრონულ ვაჭრობაში მონაწილეობის მიღებას დანაშაულებრივი ჯგუფის მიერ შექმნილი ელექტრონული პლატფორმების გამოყენებით", — აცხადებენ პროკურატურაში.

უწყების ცნობითვე, ოპერატორები მომხმარებლებს არწმუნებდნენ, რომ მათი დახმარებით, ელექტრონული ვაჭრობის შემთხვევაში, სოლიდური მოგების მიღებას შეძლებდნენ, მიღებულ თანხებს კი საქართველოში თავიანთი კომპანიების ანგარიშებზე რიცხავდნენ. პროკურატურაში ამბობენ, რომ ამ სქემით ათეულობით მილიონი ლარის უკანონო შემოსავლის ლეგალიზაცია მოხდა.

ბრალდებულები სისხლის სამართლის კოდექსის 180-ე და 194 მუხლებით არიან დაკავებული, რაც სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს. პროკურატურის განცხადებით, ხუთივე ბრალდებულისთვის პატიმრობის შუამდგომლობით საქალაქო სასამართლოს კანონით დადგენილ ვადაში მიმართავენ.

უწყებაში აცხადებენ იმასაც, რომ ასეთივე ფაქტზე ამ ეტაპზე სისხლისსამართლებრივი დევნა ორგანიზებული დანაშაულებრივი ჯგუფის კიდევ 17 წევრის მიმართაა დაწყებული, ხოლო 1 პირის შემთხვევაში საექსტრადაციო პროცედურები მიმდინარეობს.

მათივე თქმით, საქართველოში დაკავებულების გარდა, ევროკავშირის იუსტიციის ერთიანი ქსელის, ევროჯასტის მხარდაჭერით, სისხლისსამართლებრივი დევნა ჯგუფში ჩართული უცხო ქვეყნის მოქალაქეების მიმართაცაა დაწყებული.

"აღსანიშნავია, რომ საქართველოში ტრანსნაციონალური დანაშაულების წინააღმდეგ ჩატარებული ღონისძიებები, რომლის შედეგადაც სხვადასხვა დროს დანაშაულებრივი ჯგუფის წევრები არიან დაკავებული, ევროჯასტის მიერ მაღალ დონეზეა შეფასებული. საქმეზე გრძელდება ინტენსიური გამოძიება და საერთაშორისო თანამშრომლობა დანაშაულებრივი ჯგუფის წევრების, ასევე ანალოგიური საქმიანობით დაკავებული სხვა ფიზიკური თუ იურიდიული პირების გამოვლენისა და მხილების მიზნით", — ნათქვამია განცხადებაში.