NATO-ს გენერალური მდივანი, იენს სტოლტენბერგი აცხადებს, რომ მათი მტკიცე მხარდაჭერა საქართველოსა და უკრაინის მიმართ გრძელდება. მისი თქმით, არსებობს ნიშნები, რომ მოსკოვთან დიპლომატია გაგრძელდეს, თუმცა დეესკალაციას, ჯერჯერობით, ვერ ხედავენ.

"ჩვენ ვხვდებით დღეს, როცა ევროატლანტიკურ სივრცეში მშვიდობა და სტაბილურობა საფრთხის ქვეშაა. მოსკოვმა აჩვენა ნიშნები, რომ დიპლომატია, შესაძლოა, გაგრძელდეს, თუმცა ამ დრომდე დეესკალაციის ან ჯარების გაყვანის არანაირი ნიშანი არ გვინახავს. რუსეთმა კიდევ ერთხელ აჩვენა, რომ უგულებელყოფს ევროპული უსაფრთხოების პრინციპებს და მზად არის, თავისი მიზნის მისაღწევად ძალის გამოყენებით დაიმუქროს.

ვშიშობ, რომ ეს არის ახალი ნორმა, რომლისთვისაც მზად უნდა ვიყოთ. NATO-ს მოკავშირეები პოლიტიკური და დიპლომატიური გამოსავლებისკენ დაუღალავად მუშაობენ. ჩვენ ეს გავაკეთეთ საქართველოსა და უკრაინასთან მჭიდრო კავშირით. NATO-ს მტკიცე პოლიტიკური და პრაქტიკული მხარდაჭერა საქართველოსა და უკრაინის მიმართ გრძელდება", — განაცხადა მან.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. უკრაინის პრეზიდენტიც, ვოლოდიმირ ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.