საქართველოს საგარეო საქმეთა სამინისტრო ისრაელში გამგზავრების მსურველ საქართველოს მოქალაქეებს აფრთხილებს. უწყების ინფორმაციით, აღდგომის დღესასწაულის მოახლოებასთან დაკავშირებით უფრო გამკაცრებულია საზღვრის კვეთის პროცედურები და გამგზავრების მსურველებმა უნდა დაიცვან საზღვრის კვეთისთვის დადგენილი მოთხოვნები. განცხადება საგარეო საქმეთა სამინისტრომ დღეს, 15 აპრილს, აღდგომის დღესასწაულამდე ერთი დღით ადრე გაავრცელა.

საქართველოს საგარეო საქმეთა სამინისტრო საქართველოს მოქალაქეებს მოუწოდებს თან იქონიონ:

  • მგზავრობის მიზნის დამადასტურებელი დოკუმენტები;
  • მგზავრობის სრული პერიოდისათვის საარსებოდ და სამშობლოში დაბრუნებისათვის საკმარისი თანხის ფლობის დამადასტურებელი საბუთი;
  • სამგზავრო ბილეთი ორივე მიმართულებით;
  • საქართველოს მოქალაქის მოქმედი პასპორტი, რომლის მოქმედების ვადა უნდა აღემატებოდეს შესვლიდან სულ მცირე 6 თვეს.

"გასათვალისწინებელია, ასევე, ის გარემოება, რომ მოქალაქის მხრიდან, თუნდაც თხოვნის ტონით შეპასუხება შეიძლება ჩაითვალოს, როგორც სამართალდამცავი ორგანოს მიმართ წინააღმდეგობის გაწევა და შესაბამისად, ხალხის სიმრავლის გამო და წესრიგის დამყარების მიზნით შეიძლება გამოყენებულ იქნეს ძალა," - ვკითხულობთ საგარეო საქმეთა სამინისტროს განცხადებაში.

საგარეო საქმეთა სამინისტროს განცხადებით, ბოლო პერიოდის განმავლობაში გახშირდა შემთხვევები, როცა საქართველოს მოქალაქეებს არ ეძლევათ უფლება გადაკვეთონ ისრაელის სახელმწიფოს საზღვარი და უწევთ სამშობლოში უკან დაბრუნება.

"შექმნილი ვითარება განპირობებულია იმით, რომ უმეტეს შემთხვევაში დასტურდება ისრაელის სახელმწიფოში საქართველოს მოქალაქეების არამიზნობრივი მგზავრობის ფაქტები, კერძოდ, ჩვენი მოქალაქეების ისრაელის სახელმწიფოში არალეგალურად დარჩენისა და მუშაობის მიზნით გამგზავრების კუთხით," - აღნიშნავენ საგარეო საქმეთა სამინისტროში.

საგარეო საქმეთა სამინისტრო იერუსალიმიდან ისრაელში გამგზავრების მსურველებს აფრთხილებს