ხელოვნების მუზეუმიდან კიდევ ერთი თანამშრომელი გაათავისუფლეს. როგორც ეკა კიკნაძე საკუთარ Facebook-ზე წერს, ორ კვირაზე მეტია გათავისუფლებულია, თუმცა ეს მხოლოდ მას შემდეგ გაიგო, რაც ნახევარი თვის ხელფასი, 165 ლარი ჩაურიცხეს.

"ამასობაში, წულუკიანის ადმინისტრაციამ, ლაბორანტადაც აღარ გვინდიხარო. თურმე, ორ კვირაზე მეტია გათავისუფლებული ვარ, სხვა თანამშრომლებთან ერთად. თუმცა, არც შეტყობინებით შეუწუხებიათ თავი, არც ოფიციალური დოკუმენტის გამოგზავნით. პირდაპირ ნახევარი თვის ხელფასის ჩარიცხვით გამაგებინეს", — წერს ის.

ბოლო ინფორმაციით, კულტურის სამინისტროს დაწესებულებებიდან 70-მდე ადამიანი გათავისუფლდა — მათი ნაწილის ინტერესებს სოციალური სამართლიანობის ცენტრი, საია და ISFED დაიცავენ. ორგანიზაციები აცხადებენ, რომ დასაქმებულთა მხრიდან ახალი მინისტრის მიერ დაგეგმილ მნიშვნელოვან ცვლილებებთან დაკავშირებით პროფესიული და განსხვავებული პოზიციების დაფიქსირებას, შედეგად, დაუსაბუთებელი და დისკრიმინაციული გათავისუფლება მოჰყვა.

კიკნაძე 2021 წლის 31 ივლისს ლაბორანტის პოზიციაზე გადაიყვანეს. მანამდე ის მუზეუმის მმართველი იყო. როგორც კიკნაძე საუბრობდა, ეს მას შემდეგ მოხდა, რაც ევაკუაციის ახალი გეგმის გაცნობა მოითხოვა.