თბილისი ენერჯის განცხადებით, გლდანში, სავარაუდოდ, CO-თი ინტოქსიკაციის შედეგად 5 ადამიანის გარდაცვალების მიზეზი გაზის გაზქურა იყო. მათი თქმით, საგანგებო სიტუაციების სამსახურის თანამშრომლების ბინაში შესვლისას გაზქურის ღუმელი ღია და ანთებულ მდგომარეობაში დახვდათ.

თბილისი ენერჯის ტექნიკური სამსახურის დირექტორის მოადგილის, გიორგი ლეფსიწვერიძის თქმით, სავარაუდოდ, სწორედ გაზქურას იყენებდნენ გასათბობად.

"მომხდარი უბედური შემთხვევის სავარაუდო მიზეზი, რაც პირველადი დათვალიერების შედეგად ჩვენი სპეციალისტებისთვის არის CO. როდესაც სამაშველო სამსახური შევიდა ბინაში მათ აღმოაჩინეს ღია და ანთებულ მდგომარეობაში გაზქურის ღუმელი, რომელსაც, სავარაუდოდ, აღნიშნული ოჯახი იყენებდა გათბობის მიზნით", — ამბობს ის.

როგორც თბილისი ენერჯიში აცხადებენ, უსაფრთხოების ნორმების გათვალისწინებით გაზქურისა და მისი ღუმელის გათბობის მიზნით გამოყენება დაუშვებელია.

"უსაფრთხოების ნორმების გათვალისწინებით გაზქურის და მისი ღუმელის გათბობის მიზნით გამოყენება კატეგორიულად დაუშვებელია. ასეთი შემთხვევის დროს ბინაში CO (ცეო) გროვდება, რაც სიცოცხლისთვის სახიფათოა. ჩვენი სპეციალისტების მიერ, პირველადი დათვალიერების შედეგად ვვარაუდობთ, რომ აღნიშნული ფაქტი უბედური შემთხვევის გამომწვევი მიზეზი გახდა. ამ ეტაპზე მიმდინარეობს გამოძიება და მისი დასრულების შემდეგ უკვე დაზუსტებით გვეცოდინება მომხდარი ფაქტის გამომწვევი მიზეზები", — ვკითხულობთ განცხადებაში.

გლდანის მე-2 მიკრო რაიონში, ერთ-ერთ საცხოვრებელ კორპუსში 5 ადამიანი გარდაცვლილი იპოვეს. გავრცელებული ინფორმაციით, მათგან 3 არასრულწლოვანია. On.ge-ს შინაგან საქმეთა სამინისტროში უთხრეს, რომ გამოძიება სისხლის სამართლის კოდექსის 240-ე პრიმა მუხლით დაიწყო, რაც გაზის ობიექტზე უსაფრთხოების წესების დარღვევას გულისხმობს.