ამერიკის შეერთებული შტატების ელჩი საქართველოში, კელი დეგნანი უკრაინასთან დაკავშირებულ დაძაბულ ვითარებაზე აცხადებს, რომ ეს კრიზისი შექმნა თავად რუსეთმა და ისინი ჯერ კიდევ იმის გარკვევის პროცესში არიან, თუ რეალურად რა ამოძრავებს რუსეთს.

"რაც შეეხება რუსეთის საკითხს და რეგიონულ უსაფრთხოებას, კარგად დავინახეთ, რომ ეს კრიზისი ეს დაძაბულობა თავად რუსეთმა შექმნა და ჩვენ ჯერ კიდევ პროცესში ვართ იმის გარკვევის, თუ რეალურად რა დგას ამის უკან, რა ამოძრავებს რუსეთს. მიმდინარეობს დიპლომატიური შეხვედრები ამ კუთხით. ჩვენ საქართველო ჩავრთეთ ყველა იმ კონსულტაციებში, რომელიც მიმდინარეობს ამ საკითხის გადასაჭრელად.

უნდა აღინიშნოს, რომ ეს უარყოფით ზეგავლენას არამხოლოდ უკრაინასა და საქართველოზე, არამედ ეს სიტუაცია ემუქრება იმ ფუნდამენტურ პრინციპებს, რამაც საშუალება მისცა ევროპას ეარსება, ევროპაში ყოფილიყო სტაბილურობა, განვითარება, კეთილდღეობა დაეს ის ფუნდამენტური პრინციპებია, რაც ჩვენ გვაძლევს საშუალებას ვიცხოვროთ იმ ცხოვრებით, რომლითაც ვცხოვრობთ. ესაა თავისუფლება, დამოუკიდებლობა და ბევრი სხვა ადამიანის უფლება, რასაც განამტკიცებს ეს ფუნდამენტური ღირებულებები და რაც განმტკიცებულია, როგორც საქართველოს კონსტიტუციით, ისევე ამერიკის შეერთებული შტატების", — განაცხადა მან.

ელჩის თქმით, მიზანია ის, რომ კრიზისი და დაძაბულობა გადაიჭრას დიპლომატიური გზებით.

"ჩვენი მიზანი გახლავთ, რომ ეს კრიზისი, დაძაბულობა გადაიჭრას დიპლომატიური გზებით, სწორედ ამიტომ ხვალ ჟენევაში სახელმწიფო მდივანი ბლინკენი შეხვდება საგარეო საქმეთა მინისტრს ლავროვს. დღეს ბლინკენი ხვდება მოკავშირე წევრებს იმისათვის, რომ ეს კრიზისი გადაიჭრას დიმპლომატიური, მშვიდობიანი გზით. სწორედ ამიტომ ვაგრძელებთ რუსეთთან დიალოგის გზით, რომ მოვისმინოთ მათი შეხედულებები", — ამბობს დეგნანი.

კელი დეგნანმა ქართული ოცნების თავმჯდომარესთან, ირაკლი კობახიძესთან და პარლამენტის თავმჯდომარესთან, შალვა პაპუაშვილთან შეხვედრასთან დაკავშირებით თქვა, რომ განიხილეს საკონსტიტუციო ცვლილებების საკითხი და სხვა მრავალი პრიორიტეტი, რაც იქნება საკანონმდებლო სესიების განმავლობაში.

"მე ვფიქრობ, რომ ეს არის კარგი შესაძლებლობა მთლიანად პოლიტიკური სპექტრისთვის საქართველოში, რომ იმუშავონ ისეთ საკითხებზე, რაც ესოდენ მნიშვნელოვანია ქვეყნისთვის, როგორც საგარეო კუთხით, როდესაც ვსაუბრობთ რუსეთის აგრესიაზე, ასევე, შიდა გამოწვევების გადაჭრისთვის, ეს იქნება ეკონომიკური აღდგენა, კოვიდთან ბრძოლა თუ სხვადასხვა სოციალური პრობლემები.

ამერიკის შეერთებული შტატების საელჩო ამაყობს, რომ თანამშრომლობს საქართველოსთან მრავალი მიმართულებით, მათ შორის, როგორიც არის ენერგოუსაფრთხოება, განათლება და სხვადასხვა პრიორიტეტული მიმართულებები, იმისათვის, რომ ქვეყანამ შეძლოს გამოწვევების გადაჭრა", — აცხადებს ელჩი.

კიევში ჩასვლის შემდეგ ბლინკენმა განაცხადა, რომ მცირე დროში სამხედრო ძალების გაზრდა რუსეთის პრეზიდენტს, ვლადიმერ პუტინს უკრაინის წინააღმდეგ აგრესიულად მოქმედების შესაძლებლობას აძლევს.

20 იანვარს ამერიკის შეერთებული შტატების სახელმწიფო მდივანი გაემგზავრება გერმანიაში, ბერლინში, სადაც განიხილავენ რუსეთის უახლეს დიპლომატიურ ჩართულობას და ერთობლივ ძალისხმევას უკრაინის წინააღმდეგ რუსეთის შემდგომი აგრესიის შესაჩერებლად.