ინფექციური საავადმყოფოს დირექტორის, თენგიზ ცერცვაძის განცხადებით, ტესტს, განსაკუთრებით სწრაფ ტესტს ომიკრონის შტამის გამოვლენა უჭირს. ამის გამო ცერცვაძე მოსახლეობას ურჩევს, რომ ვისაც სიმპტომები აქვს, მაგრამ ტესტი დადებითს არ აჩვენებს, დარჩნენ იზოლაციაში. ამის შესახებ მან პალიტრანიუსის ეთერში ისაუბრა.

"საერთოდ არცერთი ტესტი მსოფლიოში 100%-იანი არ არის. მაგრამ ომიკრონის მიმართ კიდევ უფრო ნაკლებად მგრძნობიარეა არსებული ტესტები, ვიდრე დელტა შტამის მიმართ, განსაკუთრებით სწრაფი, მარტივი ტესტები და განსაკუთრებით პირველ დღეს, როცა ვირუსის კონცენტრაცია ჯერ ორგანიზმში მაღალი არ არის. ამიტომ, შესაძლებელია, რომ ტესტმა, განსაკუთრებით სწრაფმა ტესტმა, PCR-ის შემთხვევაში ამის ალბათობა ნაკლებია ბევრად, სწრაფმა ტესტმა შეიძლება ვირუსი ვერ დააფიქსიროს. ამიტომ პაციენტებს ურჩევენ, რომ ტესტირება სიმპტომების გამოჩენიდან მეორე დღეს ჩაიტარონ და არა აუცილებლად პირველივე დღეს.

მაინც შეიძლება იყოს გარკვეული რაოდენობა პაციენტების და არის რამდენიმე, რომლებსაც ტესტი დადებითს ვერც მეორე და მესამე დღეს უჩვენებს, მაგრამ კოვიდის ჩვენებები არის. ამ მოქალაქეებს ვურჩევთ, რომ თვითონ მოიქცნენ ისე, როგორც კოვიდიანები და ექიმებსაც მივმართავ, რომ მოექცნენ მათ ისე, როგორც კოვიდიანებს. ამით არაფერს არ დაკარგავს არც პაციენტი და არც ექიმი, თუ მას არ ექნება კოვიდი და მოვექცევით როგორც კოვიდიანს — ლაპარაკია იზოლაციაზე. დარჩნენ სახლში, იყვნენ იზოლაციაში, თუ სიმპტომები აქვთ — 8 დღე და შემდეგ კიდევ 5 დღე ატარონ პირბადე. ამით არაფერი არ დაშავდება", — თქვა ცერცვაძემ.

11 იანვარს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ თქვა, რომ კორონავირუსის დადასტურებული შემთხვევებიდან 45% ომიკრონია და ეს მაჩვენებელი მზარდია. მისივე თქმით, ომიკრონის ლაბორატორიულად დადასტურებული 1 009 შემთხვევიდან 16% რეინფიცირების შემთხვევაა.