საქართველოს პრეზიდენტი გიორგი მარგველაშვილი სამხრეთ ოსეთის დე ფაქტო რესპუბლიკაში მიმდინარე არჩევნებთან და რეფერენდუმთან დაკავშირებით განცხადებას ავრცელებს, სადაც ნათქვამია, რომ აღნიშნული ქმედება უხეშად არღვევს საერთაშორისო სამართლის ძირეულ პრინციპებს:

"იმ ტერიტორიაზე, საიდანაც ეთნიკური წმენდის შედეგად გამოდევნეს მოსახლეობის უდიდესი ნაწილი და სადაც რეალურ კონტროლს ახორციელებს უცხო ქვეყნის საოკუპაციო ძალა, შეუძლებელია ვისაუბროთ მოსახლეობის თავისუფალი არჩევანის ან ნების თავისუფლად გამოხატვის რაიმე ფორმის შესახებ.

ე.წ. რეფერენდუმი სხვა არაფერია, თუ არა მცოცავი ოკუპაციის რეჟიმის აშკარა ანექსიაში გარდასახვა იგივე სცენარით, რომელიც რუსეთის ფედერაციამ 2014 წელს განახორციელა ყირიმთან მიმართებაში".

პრეზიდენტის შეფასებით, ამგვარი ქმედება წარმოადგენს უხეშ ზეწოლას საქართველოზე და მიზნად ისახავს ვითარების შემდგომ ესკალაციას შავი ზღვისა და სამხრეთ კავკასიის რეგიონში.

პრეზიდენტი მიმართავს საერთაშორისო თანამეგობრობას მტკიცე პოზიცია დააფიქსიროს მეზობელი სახელმწიფოს სუვერენული საზღვრებისა და ტერიტორიული მთლიანობის ხელყოფის მორიგი მცდელობისა და რუსეთის პრივილეგირებული ინტერესების სფეროების პოლიტიკის მიმართ.

გიორგი მარგველაშვილის განცხადებით, "ყირიმის პრეცედენტის" დამკვიდრება საერთაშორისო ურთიერთობების პრაქტიკაში საფრთხეს შეუქმნის არამხოლოდ საქართველოს ეროვნულ უსაფრთხოებას, არამედ იმ უნივერსალური და ფუძემდებლური პრინციპების ქმედუნარიანობას, რასაც ეფუძნება თანამედროვე საერთაშორისო წესრიგი.