ნაციონალური მოძრაობის თავმჯდომარის, ნიკა მელიას განცხადებით, მარტივად პროგნოზირებადია, თუ რას იტყვიან მმართველი გუნდის ლიდერები ენმ-ს მასობრივ შიმშილობაზე. მისი თქმით, ირაკლი კობახიძე და ირაკლი ღარიბაშვილი იმაზე დაიწყებენ ლაპარაკს, რომ მოშიმშილეები ხაჭაპურს და ფელამუშს ჭამენ.

"კობახიძე და ღარიბაშვილი ადვილად პროგნოზირებადია, რას გააკეთებენ — ხაჭაპური და ფელამუშით ვიკვებებით, ეს ერთი. მეორე, იტყვიან, რომ დახოცილან 500-600 ნაცმოძრაობის [წევრი], რაც მეტი დაიხოცება, მით უკეთესი იქნება. დაახლოებით, ამ სულისკვეთების გამოხმაურება იქნება. უბედურება არის ის, რო ბატონი კობახიძის და ბატონი მდინარაძის და მათი განცხადებები არანაირი წონის მატარებელი არ არის. ძალა არის ქართველ ხალხში", — განაცხადა მან მთავარი არხის ეთერში.

მისი თქმით, ქართველი ხალხი იჩაგრება მხოლოდ იმიტომ, რომ მმართველ გუნდს ჰყავს სპეცრაზმი და ქართულ ოცნებას ჰქონდა სურვილი, ერთ კონკრეტულ დღეს საზოგადოებასა და სპეცრაზმს შორის "ორთაბრძოლა" ყოფილიყო.

დღეს, 21 დეკემბერს პარლამენტთან მიმდინარე აქციაზე მელიამ ექსპრეზიდენტ მიხეილ სააკაშვილის გათავისუფლების მოთხოვნით უვადო, მასობრივი შიმშილობა დააანონსა. მელია ამბობს, რომ ამ გადაწყვეტილებას დაახლოებით 2 კვირის განმავლობაში განიხილავდა და ექსპრეზიდენტმა სააკაშვილმა არ იცოდა. მისივე თქმით, შიმშილობაში რამდენიმე ასეული ადამიანი მიიღებს მონაწილეობას და ამ დროისთვის, 300-ზე მეტი მსურველია.

"მე მეგობრებთან ერთად, ძალიან ბევრ ადამიანთან ერთად და დარწმუნებული ვარ, ჩვენ ვიქნებით იმაზე მეტი, ვიდრე მავანს წარმოუდგენია, მიხეილ სააკაშვილის ტყვეობიდან გათავისუფლებისთვის ვიწყებთ ახალ საეტაპო ბრძოლას და დღეიდან ჩვენ ვაცხადებთ მასობრივ საპროტესტო შიმშილობის აქციას. ეს მძიმე გადაწყვეტილებაა, ეს კონსტიტუციური უფლებაა, ეს არაძალადობრივი მეთოდია პროტესტის გამოთქმისა, მაგრამ მძიმე", — განაცხადა მელიამ.

მისივე თქმით, მასობრივი საპროტესტო შიმშილობა დაიწყება კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე.