ქართული ოცნების თავმჯდომარე, ირაკლი კობახიძე 3 პრეზიდენტის შეხვედრის ინიციატივაზე აცხადებს, რომ გიორგი მარგველაშვილის განცხადება ტრაგიკომიკურია.

"ღიმილისმომგვრელიც კი არ არის ეს ყველაფერი, როდესაც მარგველაშვილი საუბრობს იმაზე, რომ პრეზიდენტის სასახლეში უნდა მივიდეს ის. ჯერ მას ვინმე რამეს ეკითხება, მერე სააკაშვილი და იქ დახვდეს ქალბატონი სალომე, ეს არის ღიმილისმომგვრელი და ღიმილისმომგვრელზე ცოტა უფრო მეტი, ტრაგიკომიკური განცხადებაა", — აცხადებს კობახიძე.

საქართველოს მეოთხე პრეზიდენტმა, გიორგი მარგველაშვილმა 13 დეკემბერს განაცხადა, რომ სამი პრეზიდენტის შეხვედრის ინიციატივა ძალიან ადეკვატურ ტაქტიკად მიაჩნია. მარგველაშვილის განცხადებით, რამდენიმე მომენტიდან გამომდინარე, ასეთი პროცესი ამ ფორმატში ვერ ჩაიკეტება. მისივე თქმით, სამი პრეზიდენტის შეხვედრა, როგორც დასაწყისი, სწორად დანახული დინამიკაა.

11 დეკემბერს მიხეილ სააკაშვილი სალომე ზურაბიშვილის ინიციატივას გამოეხმაურა ინკლუზიურ პროცესზე და გიორგი მარგველაშვილის იდეის შესრულება შესთავაზა. კერძოდ, სააკაშვილი მარგველაშვილსა და ზურაბიშვილს შეხვედრას სთავაზობს. მისივე თქმით, ზურაბიშვილს ამ შეხვედრაზე შეწყალებას არ სთხოვს.

სააკაშვილის ამბობს, რომ საქართველოს სჭირდება მშვიდობა, განვითარება და სრული გადატვირთვა. მისი თქმით, დრო ძალიან ცოტაა და არც ერთი წუთის დაკარგვა არ შეიძლება, ამიტომაც, სთხოვს საზოგადოებას, პოლიტიკურ ძალებს, არასამთავრობო სექტორს, მედიას, საერთაშორისო თანამეგობრობას, ხელი შეუწყონ რეკონსილიაციის პროცესს და მის შემოთავაზებულ ფორმატს.

გაიგე მეტი: