ქართული ოცნების დეპუტატის, გია ვოლსკის აზრით, ეკატერინე ტიკარაძის თანამდებობის დატოვების ერთ-ერთი "საგანგებო მიზეზი" გადაღლილობა იყო. ვოლსკიმ ისაუბრა იმაზეც, რომ ტიკარაძე "მაგარი ქალბატონია". მისივე თქმით, ის "საკმაოდ ქმედითია" და "კომპეტენტური მოსაზრებებიც ჰქონია". მან აღნიშნა, რომ არის რაღაც იერარქია, რაც უნდა დავიცვათ.

"რომ მკითხეს, კამათი თუ იყოო [ეკატერინე ტიკარაძესა და ირაკლი ღარიბაშვილს შორის], არც დამალულა ეს კამათი რაღაც საკითხებთან დაკავშირებით, მე ვუპასუხე, რომ კამათის დროს ჭეშმარიტება წარმოიშვება და იმედია, რომ ესეც ის შემთხვევაა. მაგრამ რაღაც უცნაურად გამოვიდა ახლა, ეკა ტიკარაძემ არ დაასახელა და მოდი, შენ გვითხარი, აბა ერთი რა მოხდა რეალურად.

ერთი რამე მინდა ვთქვა, რომ ახლა ეს ბანალური სიტყვები, ეკა ჩვენი გუნდის წევრია. მაგარი ქალბატონია და 24-საათიან რეჟიმში მუშაობს აი ამდენი ხანია, კოვიდის პირველი დღეებიდან და იქამდე კიდევ საკმაოდ სერიოზული თემებს ატარებდა თავის მხრებზე. უშველებელი სისტემა, ბევრი საკითხი მოსაგვარებელი და აი, ამ დროს კოვიდი შემოვარდნილი, ამდენი მსხვერპლი. რაღაც საკითხებთან დაკავშირებით რასაკვირველია, გადაღლილობა არის საგანგებო, ერთ-ერთი საგანგებო მიზეზი, მე მგონია ასე, ჩემი აზრია ეს. რაც შეეხება იმას, როგორც მოხდა, რა მოხდა, ალბათ, გავა დრო და თვითონაც კარგად ილაპარაკებს", — ამბობს ვოლსკი იმედის ეთერში.

ვოლსკიმ ასევე აღნიშნა, რომ გადადგომის მიზეზებზე თავად, ტიკარაძე ან პრემიერიმინისტრი, ირაკლი ღარიბაშვილი ისაუბრებს.

ეკატერინე ტიკარაძემ ჯანდაცვის მინისტრის თანამდებობა დღეს, 9 დეკემბერს დატოვა. ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ საქმიანობის პარტიის პოლიტსაბჭოში გაგრძელება მიიჩნია სწორად. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.