ადამიანის უფლებათა ევროპულმა სასამართლომ 26 მაისს დაამტკიცა შეთანხმება რუსეთის ფედერაციასა და 2006 წელს დაღუპულ მანანა ჯაბელიას ოჯახს შორის. შეთანხმების მიხედვით, რუსულმა მხარემ ჯაბელიას ქმარ-შვილს, შახ და შახ კვარაცხელიებს მატერიალური და არამატერიალური ზიანის ასანაზღაურებლად 3 თვეში უნდა გადაუხადოს 70 000 ევრო, პლუს, აანაზღაუროს ყველა ხარჯი, რაც კვარაცხელიებმა გასწიეს სასამართლო დავის დროს.

ევროსასამართლოს მიერ გამოქვეყნებულ განცხადებაში წერია, რომ საქართველოს მოქალაქე მანანა ჯაბელია ოჯახთან ერთად მოსკოვში 1994 წელს დასახლდა, სადაც ბინადრობის მოწმობა ჰქონდა. 2006 წლის 5 ოქტომბერს ის მოსკოვის ბაზარში მუშაობისას, მასობრივი რეიდის დროს დააკავეს და იზოლატორში გადაიყვანეს. როგორც აღმოჩნდა, მის პასპორტს ვადა ჰქონდა გასული და შესაბამისად, ბინადრობის მოწმობაც ძალადაკარგული იყო. სააპელაციო სასამართლომ 30 ნოემბერს გამოიტანა გადაწყვეტილება, სადაც ეწერა, რომ ჯაბელიას არ დაურღვევია რუსეთში ცხოვრების წესები. მიუხედავად ამისა, სამართალდამცავებმა ის იზოლატორიდან არ გაათავისუფლეს. 2 დეკემბერს, დილის 05:30 საათზე, მანანა ჯაბელიას დაემართა გულის შეტევა. ადგილზე არ იმყოფებოდა ექიმი, რადგან მისი სამუშაო საათები ამოწურული იყო. ადგილზე მოსულ სასწრაფოს საქართველოს მოქალაქე გარდაცვლილი დახვდა.

მიუხედავად იმისა, რომ რუსულმა პროკურატურამ გამოძიება დაიწყო, საქმე 2007 წლის იანვარში მალევე შეწყდა "დანაშაულის ნიშნების არარსებობის გამო".

ქართველთა მასობრივი დეპორტაცია მოსკოვიდან სატვირთო თვითმფრინავით. 2006 წელი, რუსეთი

ფოტო: Agenda.ge

კვარაცხელიების ოჯახი ევროსასამართლოში რუსეთს ადამიანის უფლებათა კონვენციის მეორე მუხლის დარღვევას ედავებოდა, რაც სიცოცხლის უფლების ხელყოფას ნიშნავს. მათი თქმით, რუსი სამართალდამცავებისთვის ცნობილი იყო დაკავებულის ავადმყოფობის შესახებ და მისი უკანონო დაკავებით რისკის ქვეშ დააყენა მისი სიცოცხლე და ვერ აიცილა სიკვდილი. დავის საგანი იყო მესამე მუხლი (არაადამიანური მოპყრობა) და მეთორმეტე მუხლი (სამართლებრივი დაცვის ეფექტიანი საშუალება).

რუსულმა მხარემ ევროპის ადამიანის უფლებათა სასამართლოს წარუდგინა წერილი, სადაც ეწერა, რომ ის მზად იყო საქმე მორიგებით დაესრულებინა და კომპენსაცია გადაეხადა დაზარალებულთათვის. მორიგებაზე თანხმობა განაცხადა გარდაცვლილის ოჯახმაც. შესაბამისად, სასამართლომ აღნიშნული მორიგება 2016 წლის 26 მაისს დაამტკიცა და საქმე ამორიცხა განსახილველი საქმეების სიიდან.

რუსეთ-საქართველოს შორის პოლიტიკური სიტუაციის დაძაბვის პარალელურად, რუსეთის ხელისუფლებამ 2006 წელს რუსეთში მოაწყო მასობრივი რეიდი და საქართველოს ასეულობით მოქალაქე ღირსების შემლახავი მოპყრობით ქვეყნიდან გამოაძევა. მანანა ჯაბელიაც სწორედ ამ პროცესის დროს დაიღუპა.