ჟურნალისტური ეთიკის ქარტია აცხადებს, რომ დაუშვებელია, სასამართლომ მედიას ექსპრეზიდენტ მიხეილ სააკაშვილის სასამართლო პროცესზე დასწრებისა და გაშუქების უფლება შეუზღუდოს. ქარტია ეხმაურება დღევანდელ პროცესზე დამსწრე პირებად მხოლოდ რამდენიმე ჟურნალისტის შეყვანას და აღნიშნავს, რომ მიუღებელია მედიასაშუალების არათანაბარ პირობებში ჩაყენება.

"ქარტია მიიჩნევს, რომ დაუშვებელია სასამართლომ მედიას წაართვას უფლება დაესწროს და ადგილიდან გააშუქოს მიხეილ სააკაშვილის სასამართლო პროცესი, ასევე მიუღებელია სხვადასხვა მედია არათანაბარ პირობებში ჩააყენოს. სასამართლო ვალდებულია უზრუნველყოს პროცესის საჯაროობა ყველა ჟურნალისტისთვის და სასამართლო სხდომაზე დამსწრეთა შერჩევის შემთხვევაში იხელმძღვანელოს თანაბრობის პრინციპით", — წერია განცხადებაში.

ქარტიაში აღნიშნავენ, რომ საქართველოს კანონმდებლობა არ ითვალისწინებს სხდომათა დარბაზში დამსწრეთა, მათ შორის, ჟურნალისტების რაიმე ფორმით კვოტირებას. შესაბამისად, გაუგებარია რა კრიტერიუმებით შეარჩია სასამართლომ მედიის ის ნაწილი, რომელიც სხდომას დაესწრო. მათივე განცხადებით, ამ გადაწყვეტილებით სასამართლომ შეზღუდა არამხოლოდ ჟურნალისტების უფლებები, არამედ საზოგადოებას სხდომის შესახებ ინფორმაცია სხვადასხვა წყაროდან მიღების შესაძლებლობა წაართვა.

"მიუხედავად იმისა, რომ მიხეილ სააკაშვილის სასამართლო პროცესი საზოგადოებრივი მაუწყებლის პირდაპირი ეთერით გადაიცემოდა და ის ხელმისაწვდომი იყო სხვა მედიებისთვისაც, სასამართლო დარბაზში მოხვედრილი ჟურნალისტების ნაწილს არ მიეცა აუდიოჩანაწერის გაკეთების უფლება, რაც ეწინააღმდეგება საერთო სასამართლოების შესახებ საქართველოს კანონს, რომელიც ადგენს, რომ "სასამართლო სხდომის დარბაზში მყოფ ნებისმიერ პირს აქვს უფლება, სასამართლოს მიერ წინასწარ გამოყოფილი ადგილიდან განახორციელოს სასამართლოს სხდომის აუდიოჩაწერა", — აცხადებს ქარტია.

სასამართლო მიხეილ სააკაშვილის სასამართლო პროცესზე გასაშუქებლად მხოლოდ საზოგადოებრივი მაუწყებელს უშვებს. სხვა მედიის ჟურნალისტებს პროცესზე მუშაობის საშუალება არ ეძლევათ. დღეს გამართულ საქმეზე სასამართლომ დაუშვა ჟურნალისტების გარკვეული ნაწილი, თუმცა ისინი მხოლოდ დამსწრეები იყვნენ.

პირველ დეკემბერს სააკაშვილმა სასამართლოს მიმართა, რომ დარბაზში "ნებისმიერი პოლიტიკური მიმდინარეობის ჟურნალისტი" შეეშვათ. მისივე თქმით, მისთვის მნიშვნელოვანია დარბაზში კოლეგების ნახვა, თუმცა სურს, ჟურნალისტებს ჰქონდეთ საშუალება საკუთარი თვალებით ნახონ "ისტორიულად სამარცხვინო პროცესი".