ამერიკის შეერთებული შტატების ყოფილი ელჩი იან კელი უზენაესი სასამართლოს მოსამართლეთა უვადოდ დანიშვნის პროცესზე აცხადებს, რომ ძნელი არაა იმის დასკვნა, რომ საქართველოს მთავრობის მიზანი არა დამოუკიდებელი, მიუკერძოებელი სასამართლოს შექმნა, არამედ მმართველ პარტიას დაქვემდებარებული სასამართლოს უზრუნველყოფაა.

ყოფილი ელჩი ტვიტერზე, ასევე, წერს, რომ აშშ-ს მთავრობა სწორი იქნება, თუ ფინანსური დახმარების საკითხს ეჭვქვეშ დააყენებს.

"ძნელი არ არის დავასკვნათ, რომ საქართველოს მთავრობის მიზანი არა დამოუკიდებელი, მიუკერძოებელი სასამართლოს შექმნა, არამედ მმართველ პარტიას დაქვემდებარებული სასამართლოს უზრუნველყოფაა. აშშ-ს მთავრობა სწორი იქნება, თუ მათი ფინანსური დახმარების საკითხს ეჭვქვეშ დააყენებს.

უზენაესის მოსამართლეების დანიშვნასთან დაკავშირებით აშშ-ის დღეს, 26 ნოემბერს საელჩომაც განაცხადა, რომ კიდევ ერთხელ, იმედგაცრუებული არიან.

დღეს პარლამენტში იუსტიციის უმაღლესი საბჭოს მიერ ასარჩევად წარდგენილი უზენაესი სასამართლოს მოსამართლეობის კანდიდატებთან გასაუბრების პროცესი დასრულდა. საკანონმდებლო ორგანოში გასაუბრების პროცესი ორი დღის განმავლობაში მიმდინარეობდა.

აღსანიშნავია, რომ, შარლ მიშელის შეთანხმების ერთ-ერთი მთავარი პუნქტი სასამართლო რეფორმას ეხებოდა. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეეკავებინათ. ამის მიუხედავად, პარლამენტმა სასამართლოს მოსამართლეობის 6 კანდიდატი უვადოდ დაამტკიცა. პარალელურად კი, ქართული ოცნება აცხადებდა, რომ შარლ მიშელის დოკუმენტი მათი მხრიდან სრულდება. იმის საილუსტრაციოდ, რომ შეთანხმებაში ნამდვილად ეწერა უზენაესი სასამართლოს მოსამართლეების დანიშვნებისგან თავის შეკავების შესახებ, ამერიკის საელჩომ ტვიტერზე გამოაქვეყნა დოკუმენტის ფოტო, სადაც შეთანხმების ეს ნაწილი ყვითლად არის გახაზული.

ამის შემდეგ იყო ევროკავშირის წარმომადგენლის განცხადება იმის შესახებ, რომ საქართველომ მაკროფინანსური დახმარების მიღების პირობები ვერ შეასრულა. ჟულიენ კრამპის თქმით, ამ განცხადებამდე ქართული ოცნების ხელისუფლება აქტიურად საუბრობდა იმაზე, რომ ევროკავშირისგან მაკროფინანსური დახმარების მეორე ნაწილზე უარს ამბობენ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა აღარ არის.

ამასთანავე, ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მიერ გამოქვეყნებული ანგარიშის მიხედვით, საქართველოს უზენაესი სასამართლოს მოსამართლეობის კანდიდატების წარდგენის პროცესში გამოვლენილმა ხარვეზებმა ქვეყანაში სასამართლო სისტემის დამოუკიდებლობის საკითხი რისკის ქვეშ დააყენა.