უკრაინის საგარეო საქმეთა სამინისტრო კვლავ მიმართავს საქართველოს ხელისუფლებას, უზრუნველყოს მიხეილ სააკაშვილს სათანადო სამედიცინო დახმარება, კერძოდ გადაუდებელი დახმარებისთვის მულტიპროფილურ სამედიცინო დაწესებულებაში გადაიყვანოს. მათივე თქმით, კვლავ განსაკუთრებულ ყურადღებას უთმობენ უკრაინის მოქალაქის უფლებების დაცვას და ქვეყანაში დაბრუნებას.

"უკრაინის საგარეო საქმეთა სამინისტრო შეშფოთებულია უკრაინის მოქალაქის, მიხეილ სააკაშვილის ჯანმრთელობის გაუარესებით, რომელიც იმყოფება საქართველოში, გლდანის #18 სასჯელაღსრულების დაწესებულების საავადმყოფოში",— ვკითხულობთ განცხადებაში.

მათივე ინფორმაციით, საქართველოში უკრაინის საელჩოს დიპლომატები დღეს მიხეილ სააკაშვილთან მოსანახულებლად მათ მოთხოვნაზე თანხმობას ელოდებიან. ისინი რეგულარულ კონტაქტზე არიან იურისტებთან და ნათესავებთან.

უკრაინის საგარეო საქმეთა სამინისტრომ ჯერ კიდევ 8 ნოემბერს მოუწოდა საქართველოს მთავრობას, რომ სააკაშვილი სამოქალაქო კლინიკაში დაუყოვნებლივ გადაეყვანათ. 11 ნოემბერს უკრაინის საგარეო უწყების მოადგილემ საქართველოს ელჩს განუცხადა, რომ მათ მოქალაქეს ღირსეულად უნდა მოექცენ და ფიზიკური ძალის გამოყენება დაუშვებელია.

18 ნოემბერს, მიხეილ სააკაშვილის ადვოკატმა, ბექა ბასილაიამ გლდანის მე-18 სამედიცინო დაწესებულებასთან განაცხადა, რომ სააკაშვილი ოთახიდან გასვლისას "მოსხლეტით წაიქცა" და ის საკაცით გაიყვანეს. ბასილაია ამბობს, რომ ექსპრეზიდენტს თვალები ხელით გაუხსნეს. ამის შემდეგ პენიტენციურმა გაავრცელა განცხადება, რომ სააკაშვილის ჯანმრთელობის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

გაიგე მეტი: