დროას ლიდერის, ელენე ხოშტარიას განცხადებით, მან ქართული ოცნების წევრებს, ირაკლი კობახიძე, მამუკა მდინარაძესა და შალვა პაპუაშვილს ის ვერსიები გააცნო, რაც შესაძლოა იყოს გამოსავალი. მისი თქმით, მათ შესაბამისი გადაწყვეტილების მისაღებად დრო "არც თუ ისე ბევრი აქვთ".

"ძალიან დეტალურად ვესაუბრე ქართული ოცნების წარმომადგენლებს, თუ რა არის ჩემი შიმშილობის მოტივაცია და რა არის ის პრინციპული სიმტკიცე, რომელსაც მე არ გადავუხვევ არცერთ შემთხვევაში. ეს არ არის სიჯიუტე, ეს არის ის აუცილებელი ფასი, რომელიც უნდა გადავიხადოთ იმისთვის, რომ გამოვიდეთ ამ ჩიხური ვითარებიდან", — აცხადებს ის.

დღეს ქართული ოცნების თავმჯდომარე, ირაკლი კობახიძე, აღმასრულებელი მდივანი, მამუკა მდინარაძე და საზოგადოებასთან ურთიერთობის ხელმძღვანელი, შალვა პაპუაშვილი პარლამენტში მოშიმშილე დროას ლიდერის, ელენე ხოშტარიას მოსანახულებლად მივიდნენ.

ელენე ხოშტარია მე-15 დღეა შიმშილობს და ექსპრეზიდენტის სამოქალაქო კლინიკაში გადაყვანას ითხოვს. ხოშტარია მკურნალობის მხოლოდ იმ ფორმებს თანხმდება, რაც კრიტიკული მაჩვენებლების გასაუმჯობესებლად არის საჭირო.