ნაციონალური მოძრაობის წევრის, ლევან ხაბეიშვილის განცხადებით, როცა ბიძინა ივანიშვილი "ტანკით არის მომდგარი" მასთან ბრძოლა მხოლოდ ოქმებით და კანონის მე-15 მუხლით ან ვარდით არ გამოვა. ის ფიქრობს, რომ საჭიროა ადეკვატური პასუხი.

"ის, რომ ტანკით არის მომდგარი ბიძინა ივანიშვილი და იარაღს გვიშენს პირდაპირ, ჩვენ, აღარ გამოდის, ხო, ოქმით დავხვდეთ და კანონის მე-15 პუნქტით. მაგათ არც კანონი აინტერესებთ, არც კითხულობენ, არც იციან, მეგობრებო და შესაბამისად, ტანკით რომ მოდის, ვარდი არ გამოდის. ამიტომ ჩვენც უნდა გავცეთ ადეკვატური პასუხი. ან ბოდიში და გვაქვს ამის ერთი ადგილი, ან ნუ იწუწუნებთ, რომ იცხოვრებთ რუსეთის გუბერნიაში", — აცხადებს ის.

როგორც ხაბეიშვილმა განმარტა, ეს პასუხი გულისხმობს პერმანენტულ აქციებს, პიკეტირებებს და "თუ საჭირო გახდა" ივანიშვილის "მძევლად აყვანას", რადგან მას სააკაშვილი ჰყავს მძევლად.

"პირდაპირ გეუბნებით, წინააღმდეგობრივი აქციები იქნება აუცილებლად, მათ შორის, გზების გადაკეტვით, პიკეტირებებით. ნუ, ეს პიკეტირება — სიტყვა, სიმართლე გითხრათ, არ მომწონს — არ არის კარგი, ძველმოდურია, მაგრამ იქნება. მათ შორის, არ ვიცი, ყველას ყველგან შეექმნება პრობლემა, მათ შორის, ბიძინა ივანიშვილს. თუ საჭირო გახდება, სახლშიც მივაკითხავთ, ეს იცოდეს. თუ საჭირო გახდა, ხომ ჰყავთ სააკაშვილი მძევლად და ტყვედ?! აი, ბიძინას აიყვანს ხალხი ტყვედ და მძევლად, როგორ და რანაირად — ამას ნახავს საზოგადოება ნელ-ნელა", — განაცხადა ხაბეიშვილმა მთავარი არხის ეთერში.

ნაციონალური მოძრაობის თავმჯდომარის, ნიკა მელიას განცხადებით, საპროტესტო აქციების პარალელურად, "გასაჩივრების პროცედურებშიც შედიან", რადგან დიდ პატივს სცემენ სტრატეგიულ პარტნიორებს და სურთ კიდევ ერთხელ დაარწმუნონ არსებულ რეალობაში. აღსანიშნია, რომ აშშ-ის საელჩო მოუწოდებს საარჩევნო პროცესში ჩართულ მხარეებს, გამოიყენონ სამართლებრივი მექანიზმები და მშვიდობიანი გზები საარჩევნო დავების განსახილველად. მათი განცხადებით, საქართველოს დემოკრატია ვერ გაძლიერდება კანონის მიღმა საკითხის მოგვარებით.