ყველა ბონსაის საკუთარი ისტორია აქვს, მაგრამ ამ თეთრ ფიჭვს - განსაკუთრებული. ის 390 წლისაა და ჰიროშიმაში ატომური ბომბის ჩამოვარდნას გადაურჩა. ხე ამერიკული ეროვნული კოლექციის ნაწილია.

ბონსაის ოსტატმა, მასარუ იამაკიმ უძველესი ხე 1976 წელს საჩუქრად გადასცა ამერიკის შეერთებულ შტატებს, რაც იაპონია-ამერიკის იმდროინდელ ურთიერთობებს თუ გავითვალისწინებთ, საკმაოდ უცნაური იყო. წლების განმავლობაში ხე ბონსაის მუზეუმში ინახებოდა, თუმცა მისი ისტორია არავის ახსოვდა. ასე გრძელდებოდა მანამ, სანამ 2001 წელს მუზეუმში ორი ძმა მივიდა, რომელთაც ბაბუამისის ნაჩუქარი ხე მოიკითხეს.

შიგარუ იამაკისა და აკირა იამაკის ხის შესახებ მხოლოდ ოჯახური ისტორიები სმენოდათ. როგორც მუზეუმის წარმომადგენლები ყვებიან, ორივე მათგანს ცრემლი მოერია, როცა ბოლოს და ბოლოს საკუთარი თვალით იხილეს ოჯახის ლეგენდარული რელიკვია. მათი ოჯახის ხუთი თაობა ზრუნავდა ამ ბონსაიზე, სანამ მასარუ იამაკი მშვიდობის ნიშნად გააგზავნიდა ამერიკაში. ბონსაი ჰიროშიმადან მხოლოდ 3 კილომეტრით დაშორებულ სახლში იდგა აფეთქების დროს. ვარაუდობენ, რომ ის ახლოს აღმართულმა კედელმა გადაარჩინა.

კეტლინ ემერსონ-დელი, რომელიც ამჟამად ბონსაის უვლის, ამბობს, რომ ეს საჩუქარი მეგობრობის და კავშირის ნიშანი იყო ორ განსხვავებულ კულტურას შორის.

თეთრი ფიჭვი ქოთანში 1627 წელს ჩაირგა და ის არა მხოლოდ მეორე მსოფლიო ომს, არამედ უამრავ სხვა მოვლენას მოესწრო.