სანამ ამ სტატიის კითხვას დაასრულებთ, გამორიცხული არაა, რომ ინსტაგრამზე Squid Game-ის ვარსკვლავის, ჰოიონ იუნგის გამომწერთა რიცხვი კიდევ რამდენიმე მილიონით მეტი იყოს, თუმცა ბოლო მონაცემით, სამხრეთ კორეელ მსახიობსა და მოდელს 16.9 მილიონი გამომწერი ჰყავს. აღსანიშნავია, რომ სერიალის გამოსვლამდე, დაახლოებით 3 კვირის წინ, მისი გამომწერთა რაოდენობა 400 000 იყო.

ჰოიონ იუნგი საზოგადოებამ კალმარის თამაშში 67-ე მოთამაშის როლით გაიცნო და მაშინვე შეიყვარა. ჰოიონი სამხრეთ კორეაში წარმატებული მოდელია, თუმცა კალმარის თამაშში შესრულებული როლი მისი სამსახიობო დებიუტია.

მიუხედავად იმისა, რომ სამშობლოში პოპულარობით აქამდეც სარგებლობდა, სერიალის გამოსვლის შემდეგ თითქმის მთელმა მსოფლიომ გაიცნო. 67-ე მოთამაშეს დღეს სამხრეთ კორეელ მსახიობებს შორის ყველაზე მეტი გამომწერი ჰყავს. მოდელი და მსახიობი ცოტა ხნის წინ ადიდასის კამპანიაშიც გამოჩნდა და მოდის სახლ Louis Vuitton-ის საერთაშორისო ელჩიც გახდა.

კალმარის თამაშის გამოსვლის შემდეგ სერიალის სხვა მსახიობების პოპულარობაც საკმაოდ გაიზარდა. მაგალითად, პოლიციელი ჰვან ჯუნ-ჰოს როლის შემსრულებელის გამომწერთა რიცხვი 5.2 მილიონით გაიზარდა, ხოლო 240-ე მოთამაშის გამომწერთა რიცხვი — 4.4 მილიონით.

ეს პირველი შემთხვევა არაა, როდესაც ნეტფლიქსის სერიალმა სოციალურ ქსელებში მსახიობების გამომწერთა რიცხვი გაზარდა. მაგალითად, Stranger Things-ის ვარსკვლავის, მილი ბობი ბრაუნის გამომწერთა რიცხვი დაახლოებით 10 მილიონით გაიზარდა, ზენდეიას გამომწერთა რიცხვი კი — 18.2 მილიონით.

ასეთი წარმატების შემდეგ შეგვიძლია დარწმუნებული ვიყოთ, რომ ჰოიონ იუნგს მალე ძალიან ბევრ სერიალში ვიხილავთ.