შინაგან საქმეთა სამინისტროს ინფორმაციით, არჩევნების პროცესში მომხდარ დარღვევებთან დაკავშირებით, პოლიციამ 16 სისხლის სამართლის საქმეზე დაიწყო გამოძიება. მათ შორისაა, მედიის წარმომადგენლების მიმართ პროფესიულ საქმიანობაში უკანონოდ ხელის შეშლის, ფიზიკური და სიტყვიერი დაპირისპირების, ძალადობის, თავდასხმისა და სხვა ფაქტები.

შსს-ს ცნობით, პოლიციის კანონიერი მოთხოვნის დაუმორჩილებლობის და ხულიგნობის გამოვლენილ ადმინისტრაციულ სამართალდარღვევებზე, ადმინისტრაციული წესით 7 პირი დააკავეს, მათ შორის, მარნეულში — 3 პირი, ასპინძაში — 2 პირი, ლანჩხუთში — 1 პირი და თბილისში 1 პირი.

"პოლიციამ კენჭისყრის დღეს, საარჩევნო უბნების მიმდებარე ტერიტორიაზე, მიღებული შეტყობინებებისა და მედიაში გავრცელებული ინფორმაციების საფუძველზე, ორასამდე ინციდენტზე მოახდინა რეაგირება. საარჩევნო კოდექსით დადგენილი მოთხოვნების დარღვევასთან დაკავშირებით, თითოეულ ფაქტზე, პოლიციამ განახორციელა კანონით გათვალისწინებული ღონისძიებები — დადგენილი წესის შესაბამისად, პირველ ჯერზე შესაბამის პირებს მითითება მიეცათ და მხოლოდ ერთ შემთხვევაში დაჯარიმდა მოქალაქე ადმინისტრაციული წესით — 2000 ლარის ოდენობით", — წერია განცხადებაში.

უწყებაში ამბობენ, რომ აქტიურად თანამშრომლობენ საერთაშორისო სადამკვირვებლო მისიებთან, ადგილობრივ არასამთავრობო ორგანიზაციებთან და სახალხო დამცველის აპარატთან.